Бугун, 29 декабрь куни эрталаб Наманган ва Андижон аэропортларида самолётлар кўриш масофаси пасайиб кетгани учун парвоз қила олмади ва қўна олмади.

Uzbekistan Airports хабарига кўра, кучли туман туфайли – кўриш масофаси 50 метрга яқин – «Урал» авиакомпаниясининг Қозондан парвоз қилган SVR2161 рейси соат 08:48 да Наманганга қўна олмади ва Тошкентдаги захира аэродромга жўнаб кетди.

Яна бир - HY9620 рейси ҳам ноқулай об-ҳаво шароити туфайли Наманганга қўна олмади ва Фарғонадаги захира аэродромга жўнаб кетди.

Андижон аэропортида ҳам худди шундай ҳолат. Uzbekistan Airways авиакомпаниясининг Москвадан учган HY-622/621 рейси соат 10:45 да белгиланган аэропортга қўна олмай, Фарғонадаги захира аэродромга жўнатилди. 

Метеорология хизмати прогнозларига кўра, ушбу аэропортлар об-ҳаво шароити туфайли тахминан соат 14:00 гача ёпилади. Режалаштирилган барча рейслар энг яқин захира аэродромларга йўналтирилади.