Toshkent metrosi uchun yana 14 ta poyezd xarid qilinadi

Toshkent shahrining jamoat transporti tizimi takomillashtirilib, infratuzilmasi rivojlantiriladi. Bu haqda jamoatchilik muhokamasiga qo‘yilgan O‘zbekistonning 2022—2025 yillarga mo‘ljallangan taraqqiyot strategiyasida aytilgan.

Ma’lum qilinishicha, yerusti yo‘lovchi tashish transporti yo‘nalishlari tarmog‘i metropoliten bilan integratsiyalashadi. Bu orqali jami 84 ta, jumladan, 2022 yilda 14 ta yangi harakat tarkibi (metro poyezdlari) xarid qilinadi.

Qayd etilishicha, Toshkent shahrida o‘zaro uzviy bog‘langan barcha transport turlarini rivojlantirish dasturi ishlab chiqiladi. Bu orqali 673 dona elektrobus xarid qilinadi. 11 ta magistral, 14 ta halqa, 92 ta bog‘lovchi va 42 ta yetkazib beruvchi yangi muntazam avtobus yo‘nalishi tarmog‘i yaratiladi.

Imkoniyati cheklangan shaxslar uchun qulay sharoitga ega bo‘lgan 1160 ta oraliq bekati qaytadan quriladi. Har yili 50 kilometrdan, 5 yil davomida jami 250 kilometr velosiped va piyodalar yo‘laklari quriladi.

Shuningdek:

• 52 ta avtostansiya qurish hamda 29 tasini rekonstruksiya qilish;
• 278 ta yangi avtobus yo‘nalishi ochish;
• 60 ta yangi shaharlararo avtobus yo‘nalishini tashkil etish rejalashtirilgan.