Parkentda turizm uchun maxsus soliq rejimi joriy etiladi 

Xususan, jami 700 ta joylashtirish vositasini tashkil qilish, shundan 2022 yilda 150 tasi faoliyatini yo‘lga qo‘yish mo‘ljallangan. 2022 yilda respublika bo‘yicha 500 ta oilaviy mehmon uylari tashkil qilinadi, respublika bo‘yicha 80 ta turistik korxona faoliyati yo‘lga qo‘yiladi.

Bundan tashqari, turizm sohasiga tadbirkorlik sub’yektlari va investorlarni jalb qilish ko‘zda tutilgan. Bunda quyidagi ishlar amalga oshiriladi: mahalliy hokimliklar tomonidan turizm sohasiga oid yer uchastkalarini “E-AUKSION” elektron savdo platformasiga chiqarish; alohida yo‘nalishga “halol”, “vegan” va boshqaga ixtisoslashtirilgan umumiy ovqatlanish punktlarini tashkil etish; viloyat markazlarida suvenir do‘konlari, kafeteriylar, restoranlar, choyxonalar, magazinlar, hunarmandchilik do‘konlari tashkil qilish va jozibador ko‘ngilochar xizmatlarni yo‘lga qo‘yish.

Shuningdek, Toshkent viloyati Parkent tumanida turizm uchun maxsus soliq rejimi joriy qilinadi. Bunda, yangidan tashkil etilgan tadbirkorlik sub’yektlari uch yil davomida aylanmadan olinadigan soliq va ijtimoiy soliqni 1 foiz stavkada, yuridik shaxslardan olinadigan yer solig‘i, yuridik shaxslarning mol-mulkiga solinadigan soliqlarini hisoblangan summadan 1 foiz miqdorida to‘lash tizimi joriy etiladi.