Inson qadri biz uchun qandaydir mavhum, balandparvoz tushuncha emasligi ta’kidlandi.
26 yanvar kuni davlat rahbari ishtirokida jamiyat muammolarini yechish, taraqqiyot strategiyasiga oid videoselektor yig‘ilishi o‘tkazildi. Rasmiy nutqqa o‘tish oldida prezident ko‘pchilikni o‘ylantirgan masalalarga to‘xtaldi.
«35 milliondan iborat ko‘p millatli xalqimiz dunyodagi rivojlangan davlatlarga xos hayot darajasiga erishish, adolatli, erkin va obod jamiyat qurishdek ulug‘vor maqsadlar bilan yashamoqda.
Mana, 35 mln kishidan ham oshdik, Xudoga shukr. Lekin aholi o‘sishiga yarasha sharoitlar ham yaratishimiz kerak.
Bugun biz, jonajon O‘zbekistonimizning uzoq muddatga mo‘ljallangan istiqboli bilan bog‘liq bo‘lgan, o‘ta muhim masalani muhokama qilish uchun yig‘ildik.
Hammangiz xabardorsiz, o‘tgan yili saylovoldi dasturi doirasida hududlarga tashriflarda «Inson qadri uchun» tamoyilini barcha islohotlarimizning bosh mezoni sifatida belgiladik.
«Davlat – inson uchun» degan ezgu g‘oyani hayotga tatbiq etish maqsadida 2022–2026 yillarga mo‘ljallangan Yangi O‘zbekistonning taraqqiyot strategiyasini bevosita xalqimiz bilan maslahatlashib, odamlarimizning fikr va takliflari asosida ishlab chiqdik.
Ushbu strategiyada:
- yaqin va o‘rta istiqbolda O‘zbekistonning taraqqiyot tendensiyalari qanday bo‘ladi?
- kelgusidagi faoliyatimizni belgilaydigan aynan qaysi maqsad va vazifalar, biz uchun eng dolzarb va ustuvor hisoblanadi?
- davlat va jamiyat hayotining barcha jabha va yo‘nalishlarini kompleks rivojlantirish uchun asosiy e’tiborni nimalarga qaratishimiz kerak?
- keyingi yillarda qabul qilingan qonun va qarorlarimiz, dastur va rejalarimizni yangi davrda qanday davom ettirishimiz, ularga qanday qo‘shimcha va o‘zgartirishlar kiritishimiz kerak?
– degan savollarga chuqur va atroflicha javob berilgan.
Bugungi hayotimiz va ertangi kelajagimiz bilan bog‘liq shu kabi ustuvor masalalar tahlili, «Yangi O‘zbekiston taraqqiyot strategiyasi» kitobida o‘zining batafsil ifodasini topdi. Endi xalqimiz kutyapti, bu islohotlar shabadasi qachon bizga yetib keladi, deb.
Aynan shu sababli demokratik islohotlarimizning uzviyligi va davomiyligini ta’minlash maqsadida, kelgusi faoliyatimiz uchun «Harakatlar strategiyasidan – Taraqqiyot strategiyasi sari» degan prinsipni bosh tamoyil etib belgiladik.
Shu asosda 2022 yil – «Inson qadrini ulug‘lash va faol mahalla yili» bo‘yicha davlat dasturi tayyorlanib, keng jamoatchilik muhokamasidan o‘tkazildi.
Albatta, inson qadri biz uchun qandaydir mavhum, balandparvoz tushuncha emas. Inson qadri deganda, biz, avvalo, har bir fuqaroning tinch va xavfsiz hayot kechirishini, uning fundamental huquq va erkinliklarini ta’minlashni nazarda tutamiz.
Inson qadri deganda, biz har bir fuqaro uchun munosib turmush sharoiti va zamonaviy infratuzilma tashkil etishni, malakali tibbiy xizmat ko‘rsatish, sifatli ta’lim, ijtimoiy himoya tizimi, sog‘lom ekologik muhit yaratib berishni tushunamiz.
Bu maqsadga erishish uchun esa dunyodagi noyob demokratik tuzilma bo‘lgan mahalla institutining katta imkoniyatlaridan samarali foydalanish, uning vakolatlarini yanada kengaytirish, pirovard natijada mahallani jamiyatimizning hal qiluvchi bo‘g‘iniga aylantirish vazifasini o‘z oldimizga qo‘ymoqdamiz.
Muxtasar aytganda, mahalla tinch bo‘lsa, yurt tinch bo‘ladi. Mahalla obod bo‘lsa, butun mamlakat obod bo‘ladi», – dedi prezident.
