Foto: Kuchli shamol Samarqand va Qashqadaryo viloyatidagi ko‘p qavatli binolarning tomini uchirdi

Favqulodda vaziyatlar vazirligining xabar berishicha, bugun, 2022 yil 5 mart kuni tongda esgan kuchli shamol natijasida ayrim viloyatlardagi binolarning tom qismi yerga tushgan.  

Jumladan:

• Soat 05:30da Samarqand viloyati Kattaqo‘rg‘on shahar “Vatanparvar” MFYda joylashgan to‘rtta ko‘p qavatli uyning taxminan 120 metr kvadrat, O‘zbekiston ko‘chasida joylashgan stomatologiya binosining 100 metr kvadrat, “Do‘stlik” MFYda joylashgan ko‘p qavatli uyning 250-300 metr kvadrat;

•  Soat 08:10da Nukus shahar A.Do‘snazarov ko‘chasida joylashgan uyning 350 metr kvadrat;
• Qarshi shahri 8 mitti tuman A.Navoiy ko‘chasida joylashgan uyning 100 metr kvadrat maydonida tom qismlarini shamol uchirgan.

Qayd etilishicha, voqea joylariga FVVning hududiy boshqarmalari rahbariyati va qutqaruv bo‘linmalari jalb etilib, kuchli shamol talafotlarini bartaraf etish ishlari olib borilgan. Hodisa oqibatida hech kim tan jarohati olmagan va halok bo‘lmagan.

Kattaqo‘rg‘on shahar hokimligi axborot xizmatining ma’lum qilishicha, kuchli shamol Madaniyat va istirohat bog‘idagi “Madaniyat markazi” hamda Go‘zalkent mahallasidagi turar joy binolarining tomini ham uchirgan. Oqibatda ko‘chalarda turgan mashinalar yengil shikastlangan.

Avvalroq Qashqadaryo viloyatida sodir bo‘lgan kuchli shamol yuqori kuchlanishli elektr uzatish tarmog‘i ustunini yiqitgan va Qarshi shahridagi bozor tomini uchirgandi.