Turkiyada yillik inflatsiya 1998 yildan beri eng yuqori darajaga yetdi 

Ukrainadagi urush, energiya tashuvchilar narxining oshishi va turk lirasining qulashi fonida Turkiyada yillik inflatsiya may oyida oxirgi 24 yillik eng yuqori darajaga yetdi. 

Turkiya Statistika institutining 3 iyun, juma kuni ma’lum qilishicha, mamlakatda iste’mol narxlari o‘tgan oyda yillik nisbatda 73,5 foizga oshgan va bu 1998 yil oktyabr oyidan beri eng yuqori o‘sishdir.

Inflatsiyaning tezlashishi ketma-ket 12-oy kuzatilmoqda. Bu, asosan, transport sohasida narxlarning oshishi (bir yilda 107,6 foizga o‘sish), shuningdek, oziq-ovqat va ichimliklar qimmatlashishi (o‘sish 91,6 foiz) bilan bog‘liq. Turkiyada iste’mol narxlari oylik hisobda 2,98 foizga ko‘tarildi.

Turkiya prezidenti Rajab Toyyib Erdo‘g‘an iqtisodiy o‘sish va eksportni rag‘batlantirish uchun foiz stavkalarini pasaytirish tarafdori bo‘lib, yuqori qarz xarajatlari inflatsiyaga sabab bo‘layotganini ta’kidlayapti. Bu pozitsiya o‘rnatilgan iqtisodiy holatga ziddir. Turk lirasi o‘tgan yili AQSh dollariga nisbatan qiymatining 44 foizini yo‘qotdi.

Gaz, neft va don narxining oshishiga olib kelgan Rossiyaning Ukrainadagi harbiy harakatlari Turkiyadagi vaziyatni yanada og‘irlashtirdi, deya qayd etadi AP agentligi.