Samarqand viloyatining Narpay tumanida yong‘in sodir bo‘ldi. Favqulodda vaziyatlar vazirligi rasmiy ma’lumot berdi.
Foto: Videodan kadr
Kecha, 5 iyun kuni soat 20:21 da Samarqand viloyati Narpay tumani “Sari bozor” MFYda joylashgan oziq-ovqat do‘konlarida yong‘in sodir bo‘layotgani to‘g‘risida tuman FV bo‘limiga xabar kelib tushgan.
Voqea joyiga 5 ta yong‘in-qutqaruv ekipajlari jalb etilgan. Yong‘inga soat 20:35 da yetib borgan va soat 22:10 da yong‘in to‘liq bartaraf etilgan.
Ma’lum qilinishicha, yong‘in natijasida 3 ta oziq-ovqat do‘konining taxminan 70 kvadrat metr maydonida shift, tom qismi va oziq-ovqat mahsulotlari yonib, zararlangan.
O‘z navbatida, ijtimoiy tarmoqlarda tarqalgan videolarda 10 dan ortiq do‘konning yonayotgani tasvirlangan.
FVV xabariga ko‘ra, hodisa oqibatida halok bo‘lgan va jabrlanganlar yo‘q. Hozirda tergovga qadar tekshirish ishlari olib borilmoqda.
