AQSh davlat kotibi va Xitoy TIV rahbari o‘zaro muloqotga tayyor ekanini bildirdi 

Balidagi G20 sammitidan so‘ng Entoni Blinken o‘tgan yilning oktyabr oyidan beri birinchi marta xitoylik hamkasbi bilan uchrashdi.
    
AQSh davlat kotibi Entoni Blinken 9 iyul, shanba kuni Balidagi «katta yigirmatalik» (G20) davlatlari tashqi ishlar vazirlari sammitidan so‘ng Xitoy tashqi ishlar vaziri Van I bilan uchrashdi. Bu ularning 2021 yil oktyabr oyidan beri birinchi yuzma-yuz muzokaralariga aylandi. 

«Qo‘shma Shtatlar va Xitoy o‘rtasidagi munosabatlar kabi murakkab va muhim aloqalar borasida ko‘p gapirish mumkin», deya ma’lum qildi Blinken uchrashuv boshida. U «samarali va konstruktiv suhbat» bo‘lishiga umid bildirdi.

O‘z navbatida, Van I Xitoy raisi Si Tszinpin dunyodagi ikkita eng yirik iqtisodiy kuch o‘rtasidagi hamkorlik va «o‘zaro hurmat»ga ishonishini ta’kidladi.

«Xitoy va AQSh ikkita katta davlat, shuning uchun ikki davlat normal aloqalarni saqlab turishi muhim, - dedi u jurnalistlarga. - Ayni paytda bu munosabatlarni to‘g‘ri yo‘ldan davom ettirish uchun birgalikda harakat qilishimiz kerak».