AQSh Ukrainaga 3 mlrd dollarlik yangi harbiy yordam haqida e’lon qiladi

23 avgust, seshanba kuni Amerika hukumatining rasmiy vakili ma’lum qilishicha, Qo‘shma Shtatlar Ukrainaga qariyb 3 milliard dollar miqdoridagi yangi harbiy yordamni e’lon qiladi. Bu urushning butun olti oyida Kiyevga ko‘rsatilgan eng yirik harbiy yordam paketi bo‘ladi.

U 24 avgustda nishonlanadigan Ukrainaning Mustaqillik kuniga bag‘ishlangan. U Ukraina xavfsizligiga ko‘maklashish tashabbusiga (USAI) Kongress ajratgan mablag‘lardan beriladi. USAI Bayden ma’muriyatiga qurollarni mavjud zaxiralardan olish o‘rniga, harbiy sanoatdan sotib olishga ruxsat beradi.

Mablag‘lar Kiyevga o‘rta va uzoq muddatda mudofaasini kuchaytirishga yordam beradigan dron va boshqa qurollar bo‘yicha shartnomalarni moliyalashtiradi. Shu bilan birga, Amerika rahbariyati ukrainalik harbiylarni mamlakat tashqarisida tayyorlash bo‘yicha sa’y-harakatlarni kuchaytirishi kutilmoqda. Avvalgi qurol yetkazib berish Ukrainaning shoshilinch harbiy ehtiyojlarini qondirish uchun amalga oshirilgan. 

AQShning Ukrainaga bergan harbiy yordami miqdori 10,6 milliard dollarga yetdi, deb xabar qilmoqda Reuters. AQSh oxirgi marta 19 avgust kuni Kiyevga harbiy yordam ko‘rsatganini e’lon qilgan edi. O‘shanda bu taxminan 775 million dollar edi. 

Pentagon ma’lumotlariga ko‘ra, ushbu paketga, jumladan, Amerikaning HIMARS yalpi o‘t ochish reaktiv tizimlari uchun qo‘shimcha snaryadlar, Ukrainaga Buyuk Britaniya tomonidan ilgari yetkazib berilgan 16 105 mm gaubitsa, 15 ta ScanEagle razvedka droni, 40 ta MaxxPro Mine Resistant Ambush Protected zirhli mashinalar, HARM qo‘shimcha yuqori tezlikdagi radarga qarshi raketalar, 1,5 mingta TOW tankka qarshi raketa tizimlari, 1 mingta Javelin tankka qarshi raketa tizimlari kiradi.