Rossiyaliklarga «do‘stona bo‘lmagan» mamlakatlardan aksiyalarni sotib olish cheklanadi

Rossiya Markaziy banki (MB) rossiyalik brokerlarga «nodo‘stona» mamlakatlarning qimmatli qog‘ozlarini malakasiz investorlarga sotishni taqiqlamoqchi. Bu haqda regulyator 6 sentabr, seshanba kuni ma’lum qildi. 

Shu tariqa, 1 oktyabrdan boshlab, agar bitim natijasida ularning malakasiz investor portfelidagi ulushi 15 foizdan oshsa, brokerlar bunday qimmatli qog‘ozlarni sotib olish to‘g‘risidagi buyruqni bajara olmaydi. Noyabrdan boshlab chegara portfelning 10 foizini, dekabrdan esa 5 foizni tashkil etadi. 2023 yil 1 yanvardan boshlab brokerlar malakasiz investorning xorijiy emitentlar qimmatli qog‘ozlarini «do‘stona bo‘lmagan» mamlakatlardan sotib olish bo‘yicha har qanday ko‘rsatmalari bajarilishini to‘xtatib qo‘yishi kerak. 

Cheklovlar qisqa pozitsiyalarni yopish operatsiyalariga, shuningdek, Rossiya kompaniyalari va «do‘stona bo‘lmagan» mamlakatlar emitentlari xorijiy qimmatli qog‘ozlari bilan operatsiyalarga taalluqli emas, deyiladi Markaziy bank xabarida. 

Rossiya Markaziy banki ushbu taqiq bilan malakasiz investorlar uchun infratuzilma risklarini minimallashtirishni xohlayotganini tushuntirdi. «Bunday qimmatli qog‘ozlar hisobini yurituvchi xorijiy moliya institutlari sotib olingan aktivlarni ogohlantirishsiz tasarruf etish imkoniyatini bloklashi mumkin», — deya qayd etadi tartibga soluvchi organ. Ushbu qimmatli qog‘ozlar egalarining huquqlarini himoya qilish «keyin» juda qiyin, chunki muammoni hal qilish «Rossiya yurisdiksiyasidan tashqarida», deya qo‘shimcha qildi Markaziy bank. 

Rossiya hukumati joriy yilning mart oyida «do‘stona bo‘lmagan» davlatlar ro‘yxatini tuzgan. Hozir ro‘yxatga 50 ga yaqin davlat, jumladan, Yevropa ittifoqiga a’zo barcha 27 davlat kiradi. 

Qimmatli qog‘ozlar to‘g‘risidagi federal qonunga kiritilgan o‘zgartirishlar bilan malakali investor tushunchasi aniqlashtirildi. Ular birja va birjadan tashqari bozorlarda sotiladigan barcha vositalardan foydalanish imkoniyatiga ega. Ushbu maqom quyidagi shartlardan biri bajarilgan taqdirda olinishi mumkin: 6 million rubl qiymatidagi aktivlarga ega bo‘lish yoki bir yil ichida shunga o‘xshash summaga bitimlar tuzish, qimmatli qog‘ozlar bilan shug‘ullanadigan kompaniyada tajribaga ega bo‘lish, oliy iqtisodiy ma’lumot yoki birja sohasidagi bilimni tasdiqlovchi malaka sertifikatiga ega bo‘lish.