Rossiyada yana bir munitsipal deputat Putinga qarshi ayblovlar uchun jarimaga tortildi

Yana bir deputat Rossiya prezidenti Vladimir Putinni davlatga xiyonatda ayblagani uchun jarimaga tortildi. Sankt-Peterburg sudi Smolninskoye munitsipaliteti kengashi deputati Nikita Yuferevga hokimiyatni obro‘sizlantirish moddasi bo‘yicha jarima belgiladi. Jarima miqdori 46 ming rublni tashkil etadi, dedi Yuferev 15 sentabr, payshanba kuni Twitter’dagi mikroblogida. 

Avvalroq Nikita Yuferev hamkasblari bilan birgalikda Rossiya Davlat dumasiga Putinni davlatga xiyonatda ayblash taklifi bilan murojaat qilgan edi. 14 sentabr kuni hokimiyatni obro‘sizlantirish haqidagi xuddi shu moddaga ko‘ra, yana bir Smolninskoye munitsipal deputati Dmitriy Palyuga 47 ming rubl jarimaga tortildi. Deputatlar sud qarori ustidan shikoyat qilmoqchi. 

Sud qaroriga ko‘ra, 7 sentabr kuni kechqurun Palyuga Smolninskoye munitsipaliteti binosiga kiraverishda bo‘la turib, «Rossiyaning amaldagi hukumatini obro‘sizlantirishga qaratilgan nutqi bilan noma’lum odamlar doirasiga» murojaat qilgan. U gapirayotgan paytida, Yuferev uni qo‘llab-quvvatlab turgan. 

Munitsipal deputatlar Davlat dumasiga murojaat qilib, uni Vladimir Putinni keyinroq iste’foga chiqarish uchun davlatga xiyonatda ayblashga chaqirdi. Ular fikricha, Putinning Ukrainaga qurolli bostirib kirish haqidagi qarori Rossiya va uning fuqarolari xavfsizligiga ziyon yetkazadi. Murojaatni aksariyati Smolninskoye munitsipalitetidan bo‘lgan yetti nafar deputat qo‘llab-quvvatladi.

Bo‘layotgan voqealar fonida sud Sankt-Peterburg gubernatoriga Smolninskoye munitsipalitet kengashini tarqatib yuborishga ruxsat berdi. Shahar prokuraturasi 2021 yilda kengash uch oydan ortiq vaqt davomida yig‘ilmaganligini bildirib, sudga murojaat qilgandi. Ammo eshituvlar doimo keyinga qoldirilgan. 

Moskva, Sankt-Peterburg va Viborg shaharlarining turli munitsipalitetlaridan bo‘lgan yana bir qancha deputatlar ham Putinning iste’fosini talab qilishdi.