Egallab olingan Xerson oblastining barcha «idora»lari oblast markazidan olib ketilmoqda, deb ma’lum qildi «gubernator» Saldo. Uning o‘rinbosari Stremousov Ukraina Qurolli kuchlarining hujumi boshlanganini e’lon qildi.
Xerson oblastining okkupatsion hukumati Xersonni tark etib, Dniproning chap qirg‘og‘iga ko‘chyapti. Bu haqda Rossiya tomonidan egallab olingan Ukraina mintaqasining «gubernatori» Vladimir Saldo ma’lum qildi. Okkupatsion kuch tuzilmalarining barcha organlari Dniproning chap qirg‘og‘iga o‘tmoqda, deb yozadi RIA «Novosti» 19 oktyabr, chorshanba kuni Saldoga tayanib.
Telegram-kanalida Saldo Xerson oblasti hududiga tinch aholining kirishi taqiqlangani haqida yozgan. «Aloqa chizig‘idagi keskin vaziyat hamda Xerson oblasti va Xerson shahri hududiga yirik raketa hamda artilleriya zarbasi berish xavfi kuchayishi munosabati bilan bugun oblast o‘ng qirg‘oq qismiga 7 kunlik muddatga kirishni yopish to‘g‘risida qaror qabul qilindi», dedi u.
Shu bilan birga, RIA «Novosti» Xerson oblastining okkupatsion hukumati Xerson aholisiga Ukraina armiyasi tomonidan o‘qqa tutilishi mumkinligi munosabati bilan shaharni tark etishga chaqirgan SMS-xabar jo‘natganini xabar qildi. «Hurmatli fuqarolar! Ukraina Qurolli kuchlari tomonidan turar joylar o‘qqa tutiladi. Soat 7:00 dan avtobuslar Rechportdan Chap sohilgacha yo‘l oladi. Aloqa: 88003019999», - deya bu xabarlardan iqtibos keltirgan RIA «Novosti». O‘z navbatida, Xerson oblasti «ma’muriyati rahbari o‘rinbosari» Kirill Stremousov Ukraina hujumi boshlanganini e’lon qildi. Ukraina Qurolli kuchlari «Xerson oblastining Novaya Kamenka – Berislav yo‘nalishi bo‘yicha hujumga o‘tdi», deb yozdi u Telegram’da.
Bir kun oldin Xerson oblastining bosib olingan hududi «ma’muriyati» rahbari to‘rtta munitsipalitet – Berislavskiy, Belozerskiy, Snigiryovskiy va Aleksandrovskiy tinch aholisi Dniproning chap qirg‘og‘iga evakuatsiya qilinishini bildirib, buni «uyushgan ko‘chish» deb atadi. Saldoning so‘zlariga ko‘ra, Ukraina «keng ko‘lamli hujum uchun kuch to‘plamoqda» va go‘yoki Kaxovskaya GES to‘g‘onini yo‘q qilmoqchi, shu sababli «hududlarni suv bosishi xavfi mavjud». 18 oktabr kuni Saldo Dniproning o‘ng qirg‘og‘ida joylashgan Xersondagi aholi evakuatsiya qilinish haqida xabar bermagan.
O‘sha kuni Ukrainadagi Rossiya qo‘shinlari qo‘mondoni Sergey Surovikin ushbu lavozimga tayinlanganidan beri bergan birinchi intervyusida frontdagi vaziyatni «tarang» deb atadi. «Xerson shahrining o‘zi bo‘yicha bizning keyingi rejalarimiz va harakatlarimiz yuzaga kelayotgan harbiy-taktik vaziyatga bog‘liq bo‘ladi. Takror aytaman, vaziyat bugungi kunda juda qiyin», - dedi Surovikin va «qiyin qarorlar qabul qilishi» mumkinligini qo‘shimcha qildi.
