APEC sammitida Rossiyaning Ukrainadagi tajovuzkorligi keskin qoralandi

Sammitning yakuniy deklaratsiyasida Rossiyaning Ukrainaga bostirib kirishi qoralangan, biroq sammit ishtirokchilari orasida «vaziyatga boshqa qarashlar va turlicha baho berilgani» belgilangan.

Foto: bangkokpost

Osiyo-Tinch okeani iqtisodiy hamkorligi (Asia-Pacific Economic Cooperation, APEC) sammiti ishtirokchilari yakuniy bayonotda Rossiyaning Ukrainaga qarshi tajovuzini keskin qoralab, Moskvani qo‘shni davlatdan qo‘shinlarni «to‘liq va so‘zsiz» olib chiqib ketishga chaqirdi. Bu haqda 19 noyabr, shanba kuni Bangkokda qabul qilingan sammitning yakuniy deklaratsiyasida aytiladi.

Hujjatda aytilishicha, Ukrainadagi urush jahon iqtisodiyotidagi vaziyatni keskinlashtirib, insoniyatning katta azob-uqubatlarini keltirib chiqarmoqda, energiya va oziq-ovqat beqarorligini kuchaytirmoqda. Shu bilan birga, unda «APEC a’zolarining aksariyati» urushni keskin qoralashi, ammo «vaziyatga boshqa qarashlar va turli baholar bo‘lgan»ligi ko‘rsatilgan. Yakuniy matnga kim rozi bo‘lmagani aniqlashtirilmagan.

«APEC xavfsizlik masalalarini hal qilish forumi emasligini ta’kidlagan holda, xavfsizlik masalalari jahon iqtisodiyoti uchun jiddiy oqibatlarga olib kelishi mumkinligini tan olamiz», — deyiladi bayonotda.

APEC Osiyo-Tinch okeani mintaqasidagi 21 ta iqtisodiyot ishtirokidagi forumdir. Unda Kremlning Ukrainadagi harakatlarini tanqid qilishdan o‘zini tiyib turgan Xitoy, shuningdek, Rossiyaning o‘zi ham ishtirok etyapti.