Blinken: AQSh Rossiya hududiga zarba berishga undamagan

Qo‘shma Shtatlar Kiyevning Rossiya hududiga zarbalarini «rag‘batlantirmagan» va Ukraina tomoniga ularni amalga oshirish imkoniyatini bermagan. Bu haqda 6 dekabr, seshanba kuni AQSh Davlat departamenti rahbari Entoni Blinken hujumni tanqid qilmasdan ma’lum qildi.

U, shuningdek, Qo‘shma Shtatlar «ular (Ukraina rasmiylari) – dunyodagi boshqa ko‘plab hamkorlar kabi – o‘zlarini himoya qilish, o‘z hududlarini himoya qilish, erkinliklarini himoya qilish uchun zarur bo‘lgan uskunalarga ega bo‘lishiga ishonch hosil qilish» niyatida ekanini ta’kidladi.

AQSh Davlat departamenti matbuot kotibi Ned Prays kundalik brifingda shunday pozitsiyani bildirdi: «Biz Ukrainaga o‘z chegaralaridan tashqarida zarba berish imkoniyatini taqdim etmayapmiz. Biz Ukrainani o‘z chegaralaridan tashqarida zarba berishga undamayapmiz». «Biz qilayotgan hamma narsa, butun dunyo Ukrainani qo‘llab-quvvatlash uchun qiladigan hamma narsa Ukraina mustaqilligi, uning suvereniteti va hududiy yaxlitligini qo‘llab-quvvatlash uchun amalga oshiriladi, - dedi Prays. - Biz Ukrainaga o‘z suveren hududida, Ukraina zaminida Rossiya tajovuzkorlarini daf qilish uchun foydalanishi kerak bo‘lgan narsalarni beramiz».

Vashington Rossiya tomonidan annexia qilingan Ukraina hududlariga urush boshlanishidan oldin va keyin turlicha yondashyaptimi, degan savolga Ned Prays shunday javob berdi: «Bu - Ukraina hukumatiga savol. Bu - AQSh hukumati uchun savol emas».

Ayni paytda AQSh mudofaa vaziri Lloyd Ostin Vashington Ukrainaning uzoq masofali qurollarga ega bo‘lishining oldini olish uchun «mutlaqo hech narsa» qilmayotganini ta’kidladi.

Shu bilan birga, Qo‘shma Shtatlar Ukraina qo‘shinlarini qattiq yonilg‘ida 300 kmgacha masofaga uchadigan «yer-yer» sinfidagi taktik ballistik raketalar - ATACMS bilan ta’minlashdan bosh tortmoqda.

5 dekabr kuni Rossiyaning Ryazan viloyatidagi Dyagilevo va Saratov viloyatidagi Engels aerodromlariga uchuvchisiz uchish apparatlari (UUA) yordamida hujum uyushtirildi. Ertasi kuni Kursk gubernatori Roman Starovoyt Kursk viloyatidagi aerodrom yaqinida uchuvchisiz uchoq zarba bergani, natijada «neft ombori yonib ketgani» haqida xabar berdi. Rasmiy Kiyev sodir bo‘lgan voqea uchun javobgarlikni o‘z zimmasiga olmadi.

The New York Times gazetasining yozishicha, Ryazan viloyatidagi Dyagilevo va Saratov viloyatidagi Engels aerodromlariga hujum qilgan dronlar Ukraina hududidan uchirilgan. Zarbalarning kamida bittasi baza yaqinida joylashgan va dronlarni nishonga yo‘naltirishga yordam bergan Ukraina maxsus kuchlari yordamida amalga oshirilgan, deb ta’kidladi NYT manbasi.

Rossiya Mudofaa vazirligining ta’kidlashicha, zarbalar sovet ittifoqida ishlab chiqarilgan reaktiv dronlar tomonidan amalga oshirilgan - go‘yoki Rossiya harbiy-rokosmik kuchlarining uzoq masofali aviatsiyasi samolyotlarini yaroqsiz holga keltirish maqsadida.

Volga federal okrugidagi Engels aerodromi Tu-160 tovushdan tez strategik raketa tashuvchi bombardimonchi samolyotlar, shuningdek, Tu-95 turbovintli strategik raketa tashuvchi bombardimonchilar uchun baza hisoblanadi. Tu-95MS Rossiya yadro triadasining tarkibiy qismidir. Ukraina tomoni fikricha, bu aerodromdan Ukraina infratuzilmasiga zarba berish uchun samolyotlarni uchirish maqsadida foydalaniladi.

Dyagilevo aerodromi Moskvadan 200 kilometr uzoqlikda joylashgan. Obektlar Ukraina bilan chegaradan taxminan 483-724 kilometr uzoqlikda va Ukraina arsenalidagi raketalar uchish masofasidan tashqarida, deya ta’kidladi NYT.

Kursk aeroporti shahar ichida, shahar markazidan 7 km sharqda joylashgan. Undan Ukraina chegarasining eng yaqin nuqtasigacha - taxminan 100 kilometr.