Kristianni qidirish ishlari 11 kun davom etdi.
Butun dunyo qariyb ikki hafta mobaynida Turkiya va Suriyada 6 fevral kuni ro‘y bergan dahshatli zilzila oqibatlarini kuzatib bordi. So‘nggi ma’lumotlarga ko‘ra, ikki mamlakatda tabiiy ofat qurbonlari soni 46 mingdan oshgan va bu so‘nggi raqamlar emas - joylarda xarobalarni tozalash ishlari davom etmoqda.
Futbol bilan bog‘liq markaziy syujyetlardan biri Kristian Atsuning tarixi bo‘ldi. Ganalik 31 yoshli yarimhimoyachi Turkiya chempionatida «Hatayspor» klubi a’zosi edi, bu klub zilziladan eng ko‘p talafot ko‘rgan Hatay viloyatida joylashgan. U 6 fevral kunidan aloqaga chiqmay qo‘ygandi. 18 fevral kuni esa qo‘rquv bilan kutilgan xabar tasdiqlandi — Atsuning jasadi xarobalar ostidan topildi.
Agenti va klubi Atsuning o‘limini tasdiqladi, bungacha u tirik holda chiqarib olingani haqida xabarlar tarqalgandi
6 fevral kuni Fanatik nashri Kristian Atsu va «Hatayspor» klubi sport direktori Taner Savut yo‘qolib qolgani haqida xabar bergandi. Shu kuni kechqurun Portugaliyadagi A Bola nashri Atsu bino xarobalari ostida tirik topilgani haqida xabar berdi, xabarda uning nafas olish bilan bog‘liq muammo kuzatilayotgani va oyog‘i shikastlangani haqida tafsilotlar ham bor edi. Keyingi kun tongida esa «Hatayspor» rahbariyati bu yangilikni rad etib chiqdi — klub faxriy prezidenti Lutfa Savas qidiruv ishlari davom ettirilayotganini ma’lum qildi.
Shu kuni, 7 fevralda «Hatayspor» menejyeri Mustafo O‘zat Atsu omon qolganini xabar qildi: «Kristian Atsu jarohatlar bilan topildi. Bizning sport direktorimiz Taner Savut, afsuski, hamon xarobalar ostida qolmoqda. Hatay juda jiddiy talafot ko‘rgan. Biz eng xavfli soatlar oxiriga yaqinlashmoqdamiz», — dedi u Millet nashriga. Va bu ma’lumot ham xato bo‘lib chiqdi — keyinroq O‘zat o‘ziga raddiya berdi.
«Biz «Hatayspor» prezidenti bilan Kristian Atsu masalasida uchrashuv o‘tkazdik. U xarobalar ostidan qora tanli odam chiqarib olganini, ammo bu Atsu ekani aniqligini bilmasligini aytdi», — deya izoh berdi Turkiya futbol federatsiyasi prezidenti Mehmet Buyukekshi.
Kristianning taqdiri 18 fevralga kelib uzil-kesil aniq bo‘ldi. «Kristian Atsu topildi. Afsuski, u vafot etgan», — deya yozdi ijtimoiy tarmoqlarda futbolchining agenti Murat Uzunmehmet. Keyinroq ma’lumot «Hatayspor» tomonidan tasdiqlandi, klub xabarida shunday deyilgan: «O‘z hamdardligimizni bildiramiz. Xarobalar ostida vafot etgan futbolchimiz Kristian Atsuning tanasi Ganadagi ona shahri tomon yo‘lga chiqqan. Biz seni unutmaymiz, Atsu. Go‘ringda tinch yot, ajoyib inson. Qayg‘umizni ifodalash uchun so‘z yo‘q».
