Ukraina bosh prokurori ukrainaliklar deportatsiyasini Rossiyaning genotsidi deb atadi

Ukraina bosh prokurori Andrey Kostin Rossiyani Ukraina fuqarolarini majburan ko‘chirilishi munosabati bilan genotsidda aybladi. Bu haqda u 19 fevral, yakshanba kuni Germaniyaning RTL va ntv telekanallariga bergan intervyusida aytib o‘tdi.

«Agar biz Ukrainadagi genotsid haqida gapiradigan bo‘lsak, u holda ukrainaliklar va ukrainalik bolalar majburan deportatsiya qilinishi haqida gapirish kerak», dedi Kostin. Uning eslatishicha, Rossiyaning Ukrainaga bostirib kirishi qariyb bir yildan beri davom etmoqda va Moskva mamlakatni «deukrainlashtirish» haqida ochiq gapirmoqda.

«Bunday xabarlar tajovuzkor davlatning yuqori martabali siyosatchilari tomonidan yuborilsa, bu shunchaki urush tashviqoti emas, balki vahshiylikka yaqqol da’vat bo‘ladi», - deya ta’kidladi u.

2022 yil oxirida Kostin Xalqaro advokatlar uyushmasi veb-saytida maqola e’lon qildi. Unda u Rossiyaning Ukrainadagi harbiy tajovuzkorligida «ukrainaliklarni milliy guruh sifatida Ukraina o‘ziga xosligi va Ukraina davlatchiligiga qarshi qaratilgan ta’qib qilish kampaniyasi alomatlarini yaqqol ko‘rsatayotganini» ta’kidladi.

«Bundan tashqari, sodir etilgan jinoyatlar tizimli va ommaviydir, bu genotsidga xosdir. Shularni hisobga olib, Ukraina huquq-tartibot idoralari genotsid fakti bo‘yicha jinoiy ish qo‘zg‘atdi», deb yozadi Kostin Rossiyaning tajovuzkorligini nima uchun «harbiy jinoyatlar» doirasidan tashqarida deb hisoblashini shu tarzda tushuntirib.

AQSh ma’muriyati kuni kecha Rossiyani Ukrainaga bostirib kirish paytida «insoniyatga qarshi jinoyatlar» sodir etganlikda rasman aybladi. «Genotsiddan farqli o‘laroq, insoniyatga qarshi jinoyatlar ma’lum bir guruhga qarshi qaratilgan bo‘lishi shart emas. Buning o‘rniga har qanday tinch aholi vakillari, mansubligidan qat’i nazar, hujum qurboni bo‘lishi mumkin. Yana bir muhim farq shundaki, insoniyatga qarshi jinoyatlar uchun umumiy aniq niyat mavjudligini isbotlashning hojati yo‘q», deyiladi BMT saytidagi tushuncha ta’rifida.