YeXHT Rossiyaning Baxmutdagi yo‘qotishlarini 20-30 ming kishi atrofida baholadi

2022 yil may oyidan beri Baxmut uchun janglarda Rossiya muntazam armiyasi va «Vagner» XHK 20 mingdan 30 000 minggacha askarlarini yo‘qotdi, bunda o‘ldirilgan va yaralangan jangchilar soni hisoblangan, deb yozadi «Ukrinform» YeXHTdagi Britaniya delegatsiyasining katta harbiy maslahatchisi Yan Stabbsga tayanib. 

«Rossiya Donbassdagi hujumlarini davom ettirar ekan, u juda og‘ir yo‘qotishlarga uchradi. O‘tgan yilning may oyidan buyon birgina Baxmut mintaqasida 20 mingdan 30 minggacha «vagnerchilar» va Rossiya muntazam armiyasining askarlari halok bo‘ldi hamda yaralandi - bu jami taxminan 25 kilometr oldinga siljish hisobga olinsa, katta insoniy yo‘qotishlar», - dedi Stabbs.

2023 yilning fevralidagi shiddatli janglar davomida Rossiya qo‘shinlari butun oy davomida bor-yo‘g‘i 233,94 kvadrat kilometr maydonni egallab olishga muvaffaq bo‘ldi, bu Ukraina hududining 0,039 foiziga to‘g‘ri keladi, deb yozadi Business Insider Amerika urushni o‘rganish institutiga (ISW) tayanib. 

ISW 14 mart kuni ma’lum qilishicha, ayni paytda, fevral oyida Rossiya o‘zi avval e’lon qilgan yangi hujumni boshladi va kichik yutuqlar evaziga minglab askarlari va ko‘p sonli qurollarini yo‘qotmoqda. O‘z hisob-kitoblarida tahlilchilar 31 yanvardan 28 fevralgacha bo‘lgan kartografik ma’lumotlarga asoslangan.

O‘z navbatida, War Mapper guruhining ta’kidlashicha, fevral oyida Rossiya bosib olingan hududni 85 kvadrat kilometrga oshirdi, bu Ukraina butun hududining 0,01 foiziga teng. «Rossiya bu kichik hududni minglab askarlari va harbiy texnikasini yo‘qotganidan keyin qo‘lga kiritdi», deb ta’kidlaydi nashr.