Chernogoriyada sobiq iqtisodiyot vaziri yangi prezident etib saylandi

Chernogoriyadagi prezidentlik saylovlarida ovozlarni sanab chiqish natijalariga ko‘ra, yevropaparast iqtisodchi, «Yevropa hozir» harakatidan nomzod Yakov Milatovich saylovchilarning 60 foizi qo‘llab-quvvatlagan holda g‘alaba qozondi. Bu haqda 3 aprel, dushanbaga o‘tar kechasi saylov jarayonini kuzatuvchi Monitoring markazi (CeMI) ma’lum qildi.

Saylovda mag‘lub bo‘lgan amaldagi davlat rahbari Milo Jukanovich 1991 yildan beri mamlakat bosh vaziri lavozimida besh marta ishlagan va ikki marta – 1998 yildan 2002 yilgacha va 2018 yildan hozirgacha prezident bo‘lgan. U ikkinchi tur yakunida mag‘lubiyatini tan oldi va raqibini tabrikladi. Jukanovich 21 mayga qadar prezidentlik faoliyatini davom ettiradi.

«Chernogoriya o‘z tanlovini amalga oshirdi. Men bu tanlovni hurmat qilaman va unga muvaffaqiyatli prezident bo‘lishini tilayman. Agar u muvaffaqiyatli prezident bo‘lsa, Chernogoriya ham muvaffaqiyatli bo‘ladi», - dedi Jukanovich.

Milatovich 2020 yilning dekabridan 2022 yilning apreligacha iqtisodiyot va iqtisodiy rivojlanish vaziri lavozimida ishlagan. O‘tgan yili u «Yevropa hozir» partiyasiga asos solgan. G‘alabadan so‘ng o‘z tarafdorlari oldida gapirgan Milatovich Chernogoriya kelasi besh yil ichida Yevropa Ittifoqiga qo‘shilishini va’da qildi. Mamlakat 2008 yilda Yevropa Ittifoqiga nomzod maqomini olgan.

«Chernogoriya oldinga qat’iy qadam tashladi va eskirgan Milo Jukanovich rejimi bilan xayrlashdi. Mamlakat Yevropa, yanada go‘zal va adolatli Chernogoriya tomon bir qadam tashladi», - dedi Milatovich.

Shu bilan birga, serbiyaparast lager tomonidan qo‘llab-quvvatlangan Yakov Milatovich Belgrad bilan ham aloqalarni mustahkamlashga va’da berdi.