Chernogoriyada Rybar telegram-kanali asoschisi qoʻlga olindi. Mixail Zvinchuk rafiqasi hamda kanalning uch nafar xodimi bilan birgalikda 9-oktabr tongida Risan shahrida ushlangan. Mahalliy Vijesti nashri maʼlumotiga koʻra, ularning yonida «murakkab raqamli jihozlar», shuningdek, dronlar va «elektron qurilmalar» chiqqan. Chernogoriya maxsus xizmatlari Zvinchuk va uning jamoasini bir necha kun mobaynida kuzatib borgan. OAV maʼlumotiga koʻra, ushbu operatsiya Rybar kanallari tarmogʻining «gibrid faoliyatini toʻxtatish»ga qaratilgan.
Zvinchukka qandaydir ayblov qoʻyilgani maʼlum emas. Huquq-tartibot organlari ushbu holat yuzasidan rasmiy izoh bermadi. Chernogoriya bosh vazirii Miloyko Spaich X ijtimoiy tarmogʻida hukumat «xavfsizlik xizmatlari vakolatida qolishi kerak boʻlgan maʼlumotni eʼlon qilish» niyatida emasligini maʼlum qilgan. «Ammo „Rybar“ axborot tarmogʻi rahbari qoʻlga olingan bugungi muvaffaqiyatli amaliyotdan keyingi xabar juda aniq: davlat institutlari oʻz vazifalarini bajarmoqda, Chernogoriya oʻz manfaatlarini himoya qilmoqda va hech kim bizning Yevropa kelajagimizni xavf ostiga qoʻya olmaydi», – deya qayd etgan u.
Rybar’dagilar jamoa aʼzolari qoʻlga olingani faktini tasdiqlagan. Telegram-kanalda joylashtirilgan postda qoʻlga olinganlarning barchasining Chernogoriyada boʻlib turishi qonuniy va rasmiy boʻlgani taʼkidlangan. «Xususan, rasmiy soʻrov asosida Setinskiy monastirida tasvirga olish ishlari rejalashtirilgandi», – deyiladi xabarda. Shuningdek, qoʻlga olinganlar tomonidan «mahalliy qonunchilikni buzish holatlari boʻlmagani» qayd etilib, ular tez orada ozod etilishiga umid bildirilgan. Zvinchuk chindan ham Chernogoriyaga oshkora tarzda tashrif buyurgandi – shu kunlarda u oʻsha yerda olgan videosini RuTube’dagi kanaliga joylagandi. Instagramdagi sahifasida esa Yevropa Ittifoqi, Buyuk Britaniya va Chernogoriya hukumati sanksiyalari ostida boʻlganiga qaramay, ushbu mamlakatga kira olgani haqida yozgandi: «Siz har doim barcha choʻntaklarni kavlaydigan, lekin maʼlumotlar bazasiga qarashni unutadigan ahmoq chegarachiga duch kelishingiz mumkin».
Rossiya hukumati hibsga olinganlarga diplomatik yordam koʻrsatilishini vaʼda qilgan. «Diplomatlarimiz hibsga olish sabablarini aniqlaydi va Rossiyaning har bir fuqarosi bilan boʻlgani kabi uning huquqlarini himoya qilish bilan ham shugʻullanadi», – dedi Rossiya prezidenti matbuot kotibi Dmitriy Peskov. Rossiya Xavfsizlik kengashi rahbari oʻrinbosari Dmitriy Medvedev esa rossiyaliklar Yevropa mamlakatlarida «bekorga izgʻib yurgani»ni aytdi va Rossiyada yevropaliklar va xorijliklarni «ayirboshlash fondi»ni shakllantirishga chaqirdi.
