Qoʻshimcha funksionallar
-
Tungi ko‘rinish
Qozog‘iston fuqarolarining Ukrainadagi urushda ishtiroki bo‘yicha 10 ta jinoiy ish qo‘zg‘atildi
Ular kim tarafda jang qilgani ma’lum emas.
Qozog‘iston Milliy xavfsizlik qo‘mitasi (MXQ) mamlakat fuqarolarining Ukraina hududidagi urushda ishtiroki bo‘yicha 10 ta jinoiy ish tergovini olib bormoqda. Bu haqda KazTAG nashri departament matbuot xizmatiga tayanib xabar berdi.
MXQ boshqa tafsilotlarni, jumladan, ish bo‘yicha ayblanuvchilar haqida ma’lumotlarni oshkor qilmagan. Qozog‘iston fuqarolari kim tarafda jang qilgani ham ma’lum emas.
Qozog‘iston Jinoyat kodeksiga ko‘ra, xorijdagi qurolli mojarolarda qatnashish 5 yildan 9 yilgacha ozodlikdan mahrum qilish bilan jazolanadi.
2022 yil sentabr oyida Vladimir Putin Rossiya Qurolli Kuchlari va «boshqa qo‘shinlar» tarkibida xizmat qilish uchun shartnoma imzolagan xorijliklar Rossiya fuqaroligini soddalashtirilgan tartibda olishi mumkinligi haqidagi qonunni imzolagan edi.
Avvalroq, «Azattiq» radiosi «Vagner» XHK tarkibida Rossiya tomonida Ukrainada jang qilgan bir necha Qozog‘iston fuqarolari haqida xabar berdi. Nashrning qayd etishicha, ular orasida ko‘ngillilar ham bor.
