Prezident: tibbiyotga budjetdan ajratiladigan yillik mablag‘ hajmi 6 milliard dollarga yetkaziladi

“Yurtimizda o‘rtacha umr davomiyligini hozirgi 73 yoshdan kelgusida 78 yoshga yetkazish bo‘yicha barcha imkoniyatlarni ishga solamiz”, dedi u.

Buning uchun, 2030 yilga qadar:

• onalar va bolalar o‘limi, bolalar o‘rtasida irsiy kasalliklarni kamida 2 barobarga qisqartirish;
• onkologiya, yurak-qon tomir, diabet, nafas yo‘llari va yuqumli kasalliklar bo‘yicha erta o‘limni esa, 2,5 barobar kamaytirish asosiy vazifa bo‘ladi.

Bunda:

• 120 ming nafar onkologiya, 350 ming nafar diabet, 1,5 million yurak-qon tomir kasalligi bor bemorlar to‘liq qamrab olinadi;
• “Gepatit S” kasalligini 100 foiz davlat hisobidan davolash yo‘lga qo‘yiladi;
• “tuberkulyoz” bilan kasallanish darajasi yuz ming aholiga nisbatan hozirgi 34 nafardan keskin kamaytirishga erishiladi.

Shu bilan birga, kelgusi yildan birlamchi bo‘g‘in orqali eng ko‘p uchraydigan 10 ta kasallikni davolash va 6 ta tibbiy xizmatdan iborat kafolatlangan tibbiy paket aholiga bepul taqdim etiladi.

Onkologik bemorlar hayotini saqlab qolish maqsadida, mamlakatda ilk bor o‘zak hujayralarini transplantatsiya qilish yo‘lga qo‘yiladi. Bu boradagi xarajatlar ehtiyojmand oilalar farzandlari uchun to‘liq davlat hisobidan qoplanadi.

Tug‘ish yoshidagi va homilador ayollar, bolalarga 7 turdagi vitaminlar, yod va foliy kislotasini bepul tarqatish kelgusi yillarda ham davom ettiriladi.

Sog‘liqni saqlash tizimi to‘liq raqamlashtiriladi va tibbiy sug‘urta tizimi joriy qilinadi. 

2030 yilga qadar tibbiyotga budjetdan ajratiladigan yillik mablag‘ hajmi 2 karra oshirilib, 6 milliard dollarga yetkaziladi.

Ijtimoiy xizmatlar sohasi butkul qayta ko‘rib chiqiladi. Har bir mahallada professional ijtimoiy xodimlar faoliyati yo‘lga qo‘yiladi va ular ijtimoiy xizmatlarni manzilli asosda ko‘rsatadi. Og‘ir hayotiy ahvolga tushgan yoki tushish xavfi yuqori bo‘lgan har bir oila bo‘yicha alohida “ijtimoiy xizmat ishi” ochiladi. Ushbu oilalarda sharoitni yaxshilash, ularga davolash, dorilarni yetkazish, farzandlarini bog‘cha va maktabga joylashtirish, moddiy yordam berish kabi ijtimoiy xizmatlar ko‘rsatiladi.

Og‘irroq vaziyatdagi oilalarga psixologik yordam ham beriladi. Bunday oilalarning hayot sifati amalda yaxshi tomonga o‘zgargandan keyingina, “ijtimoiy xizmat ishi” yopiladi.

Tumanlarda:

• ijtimoiy xizmatlarni “yagona darcha” tamoyili asosida ko‘rsatadigan ijtimoiy xizmatlar markazlari;
• psixolog, huquqshunos, ijtimoiy xodimdan iborat “mobil guruhlar”;
• zo‘ravonlikka uchragan ayollarni ijtimoiy qo‘llab-quvvatlash bo‘yicha “Koll-markazlar” tashkil qilinadi.

Qiyin ahvolga tushib qolgan xotin-qizlar uchun huquqiy va psixologik yordam ko‘rsatish xizmati kengaytiriladi. Tug‘uruq ta’tilidagi ayollar uchun onlayn ishlash tizimi joriy etiladi. Bolalarni vasiylikka olish tizimi, vasiylarni tanlash mezonlari va monitoring qilish tartibi to‘liq o‘zgaradi.

Har yili yurak nuqsoni bor 5 ming bolani va ko‘rish qobiliyatini yo‘qotish ehtimoli yuqori bo‘lgan 10 ming chaqaloqni bepul davolashni davlat o‘ziga majburiyat qilib oladi.

Hozirgi 6 ta vazirlikda tarqoq bo‘lgan ijtimoiy xizmatlar birlashtirilib, Ijtimoiy himoya milliy agentligi tashkil etiladi (kambag‘allik, sog‘liqni saqlash, maktab ta’limi, moliya, ichki ishlar, oliy ta’lim). Yangi Agentlik uchun kamida 10 foiz xodimlar nogironligi bo‘lgan shaxslar orasidan tanlov asosida ishga olinadi. Ijtimoiy himoyaga ajratiladigan barcha mablag‘lar Agentlik huzurida tashkil etiladigan alohida jamg‘arma orqali manzilli yo‘naltiriladi va uning xarajatlari ochiq-oshkora bo‘ladi.