AQSh mablag‘lari Ukraina uchun uchirish qurilmalari va Hawk raketalari, shuningdek, ikki turdagi ilg‘or Patriot raketalarini sotib olishga sarflanadi, deb yozadi Bloomberg.
9 iyun, juma kuni Qo‘shma Shtatlar Ukrainaga uzoq muddatli harbiy yordamning yangi paketini, jumladan, havo hujumidan mudofaa tizimi uchun o‘q-dorilar bo‘yicha qiymati 2 milliard dollardan ortiq to‘plam taqdim etilishini e’lon qilishni rejalashtirmoqda. Bu haqda 8 iyun, payshanba kuni kechqurun Bloomberg AQSh ma’muriyatidagi manbalarga tayanib xabar berdi.
Ularga ko‘ra, Ukraina xavfsizligiga ko‘maklashish tashabbusi (USAI) doirasida ajratiladigan mablag‘lar Hawk zenit tizimi uchun raketalar va uchirish qurilmalari, shuningdek Patriot havo mudofaa tizimi uchun ikki turdagi ilg‘or raketalar - Lockheed Martin tomonidan ishlab chiqarilgan PAC-3 va Raytheon Technologies ishlab chiqargan GEM-T'ni sotib olishga yo‘naltiriladi.
AQSh prezidenti Jo Bayden va Buyuk Britaniya bosh vaziri Rishi Sunak 8 iyun kuni Vashingtonda bo‘lib o‘tgan uchrashuvda mamlakatlar Ukrainani Rossiya bilan urushda qo‘llab-quvvatlashda davom etishlarini ma’lum qildi.
Vashington Moskva qo‘shni davlatda agressiv harbiy harakatlarini davom ettirar ekan, Kiyevga zarur mablag‘ni beradi, dedi Bayden. Sunak, o‘z navbatida, Ukraina tarafdorlari Rossiyaga Kiyev oladigan yordam tugashini kutmaslik kerakligi haqida aniq ishora berishlari lozimligini ta’kidladi.
