Erdo‘g‘an ayollarning bosh kiyim kiyish huquqini Konstitutsiyada mustahkamlab qo‘yishni taklif qildi

Turkiya hukumati dunyoning 10 ta yetakchi iqtisodiyotiga kirmaguncha to‘xtamaydi. Bu haqda Adolat va taraqqiyot partiyasi fraksiyasining parlamentdagi yig‘ilishida so‘zga chiqqan prezident Rajab Toyyib Erdo‘g‘an aytdi. 

Davlat rahbari so‘zlariga ko‘ra, Vazirlar Mahkamasi Turkiyani rivojlantirishning 12-rejasi, shuningdek, mamlakatni o‘rta muddatli rivojlantirish dasturi ustida ishni davom ettirmoqda. 

«Aminmanki, mamlakatimizning barcha 85 million aholisi Turkiyaning iqtisodiy farovonligidan bahramand bo‘ladi. Iqtisodiy sohadagi ishlarni muvofiqlashtirish uchun biz vitse-prezident devoni, Moliya vazirligi va Markaziy bank o‘rtasida yaqin aloqalar o‘rnatdik», dedi Erdo‘g‘an. 

Prezident Turkiyaning so‘nggi o‘n yillikdagi taraqqiyotining yaqqol ko‘rsatkichi eng kam ish haqi miqdori bo‘lib, so‘nggi 21 yil ichida real ko‘rsatkichlarda 312 foizga oshganini ta’kidladi. 

Shuningdek, Erdo‘g‘an mamlakat Konstitutsiyasining yangi tahriri qabul qilinishi Turkiyaning yanada rivojlanishi uchun muhim rag‘bat bo‘lishini ta’kidladi. 

«Turkiyaning 100 yilligi» konsepsiyasini harbiy to‘ntarish oqibatida ishlab chiqilgan va qabul qilingan Konstitutsiya asosida amalga oshirib bo‘lmaydi», dedi Prezident. 

Davlat rahbari mamlakat Asosiy qonunining yangi tahririda musulmon ayollarning bosh kiyim kiyish huquqini mustahkamlab qo‘yishni taklif qildi. 

Prezident Erdo‘g‘an hokimiyat muxoliflarini Turkiyaning yangi Konstitutsiyasi ustidagi ishlarni qo‘llab-quvvatlashga chaqirdi.