Shavkat Mirziyoyev: odamlar rozi bo‘lsa, massivlardagi eski uylar yangilab beriladi

O‘zLiDePdan prezidentlikka nomzod Shavkat Mirziyoyev Toshkent viloyati saylovchilari bilan uchrashuvda ishtirok etmoqda. Nomzod o‘z saylovoldi dasturidan o‘rin olgan qurilish sohasini rivojlantirishga oid rejalariga to‘xtaldi.

“Kelgusi yetti yilda mamlakatimiz bo‘yicha 1 million xonadonli uy-joylar qurish bo‘yicha katta marralarni belgilab olganmiz. Bunda “Yangi O‘zbekiston” massivlari soni 100 taga yetkazilib, qo‘shimcha 200 mingta oilaga mo‘ljallangan uylar barpo etiladi. Bunga qo‘shimcha ravishda 700 mingta xususiy uy-joylar barpo etiladi”, dedi nomzod.

Nomzodning keltirishicha, birgina Toshkent viloyatidagi jami 5 mingga yaqin ko‘p qavatli uylarning yarmi bundan 50 yildan oldin qurilgan. Shu bois, yil yakunigacha ushbu uylarning joriy holati, jumladan zilzilaga chidamli ekanligi to‘liq o‘rganiladi.

Umuman, aholi bilan maslahatlashgan holda, ularning roziligi bilan xizmat muddatini o‘tab bo‘lgan massivlarni yangilash bo‘yicha ishlar amalga oshiriladi.

“Albatta, bu jiddiy masala. Shuning uchun renovatsiyaning mustahkam huquqiy poydevori bo‘lishi kerak. Shu maqsadda, Renovatsiya dasturlari faqat va faqat odamlarimizning roziligi va keng jamoatchilik fikrini olgan holda qabul qilinadi”, dedi Mirziyoyev.

Shuningdek, 2025 yilga qadar 25 ta shaharning, 2030 yilgacha esa barcha aholi punktlarining bosh rejalarini ishlab chiqish to‘liq yakunlanishi ham aytildi.

“Bosh plan”larni ishlab chiqish jarayonlari aholi va tadbirkorlar uchun ochiq-oshkora va shaffof bo‘ladi. Buning uchun alohida portal ishga tushirilib, ularning tashabbus va takliflari albatta inobatga olinadi. Bu maqsadlarga kelgusi yetti yilda 2 trillion so‘m yo‘naltiramiz”, dedi nomzod.