Rossiyada raqamli rivojlanish vaziri o‘rinbosari uy qamog‘iga olindi

Rossiya raqamli rivojlanish vaziri o‘rinbosari Maksim Parshin o‘ta yirik pora olganlikda ayblanmoqda. Tergov amaldorni hibsga olishni so‘ragan, biroq sud rad javobini bergan.

Maksim Parshin / Foto: RBK

Moskvaning Basmanniy sudi yirik pora olganlikda ayblangan Rossiya raqamli rivojlanish, aloqa va ommaviy kommunikatsiyalar vaziri o‘rinbosari Maksim Parshinni ikki oyga – 12 sentabrgacha uy qamog‘iga jo‘natdi. Bu haqda 13 iyul, payshanba kuni kechqurun sud matbuot xizmati ma’lum qildi.

«Tergovning Parshinga nisbatan qamoqqa olish tarzidagi ehtiyot chorasini tanlash haqidagi iltimosnomasi qanoatlantirilmadi. Sud Parshinga nisbatan 2023 yil 12 sentabrgacha bo‘lgan muddatga uy qamog‘i tarzidagi ehtiyot chorasini tanladi», - deyiladi xabarda. Bu haqda Rossiya axborot agentliklari xabar berdi.

Qayd etilishicha, mansabdor shaxsni hibsga olish to‘g‘risidagi qaror hali kuchga kirmagan va unga apellyatsiya tartibida shikoyat qilish mumkin.

Avvalroq xuddi shu ish bo‘yicha sud Parshinga pora berganlikda ayblanayotgan «Budjet va moliyaviy texnologiyalar» kompaniyasi bosh direktori Aleksandr Monosovni 12 sentabrgacha uy qamog‘ida o‘tkazgan edi. Shu bilan birga, tergov har ikki ayblanuvchini qamoqqa olishni so‘radi.

Maksim Parshinning hibsga olingani 13 iyul kuni kechqurun ma’lum bo‘ldi. Moskva Basmanniy sudi veb-saytida jinoiy ish kartochkasi paydo bo‘ldi, unga ko‘ra u juda katta miqdorda pora olganlikda ayblanmoqda.

Rossiya Jinoyat kodeksining ushbu moddasi bo‘yicha eng ko‘p jazo 15 yil ozodlikdan mahrum qilish, shuningdek, 15 yilgacha muayyan lavozimlarni egallash yoki muayyan faoliyat bilan shug‘ullanish huquqidan mahrum qilish bilan pora miqdorining yuz baravarigacha jarima hisoblanadi.

Davlat dumasining Axborot siyosati qo‘mitasi raisi Aleksandr Xinshteyn o‘zining Telegram-kanalida ma’lum qilishicha, Parshin «poytaxt restoranlaridan birida 3,5 million miqdorda pora olayotgan vaqtida» jinoyat ustida qo‘lga olingan. U pora qaysi valutada olinganini aniqlashtirmadi. Dastlabki versiyaga ko‘ra, pul «grantlar ajratishda yordam» uchun mo‘ljallangan, deb yozadi Xinshteyn.

Raqamli rivojlanish vazirligi «davom etayotgan tergov munosabati bilan huquqni muhofaza qilish organlariga barcha zarur yordam ko‘rsatilayotganini» bildirdi.