Chaqiruv yoshining o‘zgarishi 2 mlndan ortiq rossiyalikka ta’sir qiladi

Agar Rossiya hukumati chaqiruv yoshi chegaralarini kengaytirsa, joriy chegara 18 yoshdan 27 yoshgacha bo‘lgan darajadagidan 2 million ko‘proq odam harbiy xizmatga chaqiriladi. Bu haqda Gaydar nomidagi Iqtisodiy siyosat instituti tadqiqotchisi Igor Yefremovning hisob-kitoblarida aytilgan. U 23 iyul, yakshanba kuni RBK agentligi tomonidan e’lon qilindi.

O‘tgan yildagi aholi statistik ma’lumotlariga ko‘ra, migratsiyani hisobga olmaganda, eski chaqiruv qoidalari bo‘yicha 2023 yilda muddatli harbiy xizmatga chaqirilganlar soni 6,78 million kishini tashkil etadi, 2024 yilda 6,8 million kishi muddatli harbiy xizmatga chaqiriladi, keyin esa bu ko‘rsatkich har yili qariyb 100 ming kishiga oshadi. 

Muddatli harbiy xizmatga chaqirilish yosh chegaralarining 18 yoshdan 30 yoshgacha kengaytirilishi bilan kontingent soni 2024 yilda qariyb uchdan birga – 9,14 million kishiga, 2025 yilda – 9,13 million kishiga, 2026 yilda – 9,16 million kishiga, 2027 yilda – 82 million kishiga yetadi, deya hisoblaydi Yefremov.

Tadqiqotchi bu taxminiy hisob-kitoblar bo‘lib, aholini ro‘yxatga olishda yo‘l qo‘yilgan xatolar, migratsiya va boshqa omillarni hisobga olmaslik tufayli noto‘g‘ri bo‘lishi mumkinligini ta’kidladi. Demograf Aleksey Rakshaning ta’kidlashicha, 2021 yilgi aholini ro‘yxatga olish ma’lumotlaridagi xatolarni hisobga olgan holda, 2023 yil boshida Rossiyada 21 yoshdan 29 yoshgacha bo‘lgan 6,5 million erkak borligi ma’lumdir. Rakshaning hisob-kitobiga ko‘ra, harbiy xizmatga chaqirilish yoshining kengayishi bilan potensial chaqiriluvchilar soni 2,2 million kishiga ko‘payadi.