Boltiqbo‘yi mamlakatlari Rossiya elektr tizimidan ajralib chiqmoqda

Latviya, Litva va Estoniya 2025 yilning fevraliga qadar energiya ta’minoti tarmoqlarini Rossiyadan ajratib, kontinental Yevropa tarmoqlari bilan sinxronlashtiradi. Boltiqbo‘yi davlatlari energiya tarmoqlari operatorlarining bunday qarori 2 avgust, chorshanba kuni Litva Energetika vazirligi tomonidan e’lon qilindi.

Litva, Latviya va Estoniya bunday qadamga tayyorlanayotgani haqida avvalroq Delfi internet nashri yozgan edi. «Shartnomani amalga oshirishda operatorlar 2024 yil avgust oyida BRELL kelishuvini (energiya tizimlari sinxron ishlashini nazarda tutuvchi Belarus, Rossiya, Estoniya, Latviya va Litva elektr halqasi) uzaytirmaslik haqidagi qo‘shma qaror haqida xabardor qilishi kerak bo‘ladi. 2025 yilning fevralidan kechiktirmay kontinental Yevropa tarmoqlari bilan sinxronlashtirish ishlarini yakunlash lozim», — deyiladi Litva Energetika vazirligining 25 iyuldagi bayonotida. 

Vazirlik tushuntirishicha, BRELLdan ajralish qarori «Ukrainadagi urush sharoitida mintaqadagi o‘zgargan geosiyosiy xavfsizlik vaziyatini hisobga olgan holda» qabul qilingan va bu «Boltiqbo‘yi davlatlarining umumiy energiya xavfsizligi maqsadlari bo‘yicha kelishuvga erishishda birdamligini yana bir bor tasdiqlaydi».

2022 yil dekabr oyida Estoniya bosh vaziri Kaya Kallas Tallin BRELL halqasidan favqulodda uzilishga tayyorligini, biroq yuzaga kelishi mumkin bo‘lgan xavflarni minimallashtirishni xohlayotganini aytgandi. Kallas ta’kidlashicha, uning mamlakatida bunday qadam uchun siyosiy iroda bor, lekin hali bir qator texnik elementlar yetishmayapti.