Maktablarda o‘quvchilarni kasbga o‘qitish bo‘yicha Oqdaryo tajribasi yo‘lga qo‘yiladi

Ma’lum qilinishicha, bu yil 387 ming nafar o‘quvchi maktabni tamomlagan bo‘lsa, shundan 138 mingtasi oliygohlarga o‘qishga kirgan, yana 54 mingtasi professional ta’lim bilan qamrab olinadi.

“Qolgan 195 ming nafar yoshlar-chi? Ular ertaga ish topa olmasa, kim bo‘ladi? Namangan – 32 ming, Qashqadaryo – 30 ming, Samarqand – 25 ming, Qoraqalpog‘iston va Andijon – 18 mingdan, Toshkent viloyati – 16 ming, Jizzax va Farg‘ona – 14 mingdan, Xorazm – 10 ming, Surxondaryo – 7 ming, Buxoro va Navoiy – 4 mingdan, Sirdaryo va Toshkent shahri – 2 mingdan.

O‘tgan hafta Oqdaryodagi 32-maktabda tadbirkorlar bilan hamkorlikda o‘quvchilarni kasbga o‘qitish tajribasi bilan tanishdim. Ushbu maktabda o‘quvchilarni 7-sinfdan boshlab mahalla va tumanda talab yuqori bo‘lgan veterinar, agronom, meva-sabzavot quritish, ipakchi, mebelchi, avtomobil ustasi kabi 15 ta kasb-hunarga o‘rgatish va 2 ta chet tilini o‘qitish yo‘lga qo‘yilgan. 

Eng muhimi, bu ishlar mahalliy budjet va tadbirkorlar hisobidan tashkil qilingan bo‘lib, o‘quvchilar bu yerda ish haqi olmoqda”, dedi prezident.

Bildirilishicha, barcha viloyatlar “OblONO” rahbarlari Oqdaryoga borib, bir hafta davomida ushbu tajribani o‘rganadi.

Erkin Turdimov (Samarqand viloyati hokimi - tah.) keyingi o‘quv yiliga qadar Samarqanddagi har bir tumanda 10 tadan maktabda bu tizimni joriy qiladi. Qolgan viloyat hokimlari yil yakunigacha har bir tumanda kamida ikkitadan maktabda ushbu tajribani yo‘lga qo‘yadi.