Markaziy Osiyo davlatlari transportda yuk tashish jarayonini soddalashtiradi

Dushanbeda bo‘lib o‘tadigan mintaqa davlat rahbarlarining beshinchi Maslahat uchrashuvi doirasida Markaziy Osiyoda quruqlikdagi transportning o‘zaro bog‘liqligini mustahkamlash to‘g‘risidagi Bitim loyihasi imzolanadi. Uchrashuv 2023 yil 14-15 sentabr kunlari bo‘lib o‘tadi, deb xabar berdi Tojikiston Transport vazirligiga tayanib Asia-Plus.

Xabarda aytilishicha, hujjat mintaqa mamlakatlari o‘rtasida transport va logistika sohasida mustahkam aloqalarga erishishga qaratilgan.

U, xususan, quyidagilarni nazarda tutadi:

• quruqlikdagi transportda xalqaro tashuvni rivojlantirish uchun qulay shart-sharoitlar yaratish;
• Markaziy Osiyoda transport xizmatlari bozorida raqobat muhitini ta’minlash;
• samaradorlikni oshirish va yangi xalqaro, shu jumladan multimodal koridorlarni shakllantirish;
• quruqlik transportida tashish va tranzit jarayonini soddalashtirish;
• zamonaviy transport va logistika xizmatlarini rivojlantirish;
• innovatsion texnologiyalarni joriy etish va ulardan foydalanish, shu jumladan quruqlikdagi transportda tashish jarayonini raqamlashtirish;
• ekologik toza transport turlaridan foydalanish amaliyotini rag‘batlantirish va rivojlantirish.

Mintaqa davlatlari rahbarlarining maslahat uchrashuvi doirasida mintaqaning beshta davlati transport vazirlarining uchrashuvi ilk bor bo‘lib o‘tadi.

13 sentabrga belgilangan yig‘ilishda Qozog‘iston transport vaziri Marat Karabayev, Qirg‘iziston transport va kommunikatsiyalar vaziri Tilek Tekebayev (tasdiqlash bosqichida), O‘zbekiston transport vaziri Ilhom Mahkamov, Turkmaniston Transport va kommunikatsiyalar agentligi bosh direktori Mammetxon Chakiyev va Tojikiston transport vaziri Azim Ibrohim ishtirok etishi kutilmoqda.

Tomonlar transport-logistika va ularni yanada uyg‘unlashtirish masalalarini muhokama qiladi. Uchrashuv yakunlari bo‘yicha vazirlar Qo‘shma bayonot qabul qiladi.