O‘zbekiston va Janubiy Koreya mehnat munosabatlari sohasidagi hamkorlikni kuchaytiradi

Uchrashuvda ikki tomonlama aloqalarda mehnat munosabatlari bilan bog‘liq yo‘nalish muhim ahamiyat kasb etishi, bu boradagi loyihalarni hayotga tatbiq etishning huquqiy asoslarini birgalikda ishlab chiqish, munosib mehnat, qulay va xavfsiz mehnat sharoitlarini yaratish kabi masalalar muhokama qilingan. 

Muhokama davomida mehnat migratsiyasining uyushgan shakllarini kengaytirish, respublikadan tashqariga ishlash uchun chiqayotgan fuqarolarning mehnat va ijtimoiy huquqlarini himoya qilishni ta’minlash, xorijdan qaytgan mehnat migrantlarini tadbirkorlik va mehnat faoliyatiga keng jalb etish bo‘yicha qo‘shma loyihalarni amalga oshirish muhimligi qayd etilgan. Shuningdek, har yili O‘zbekiston mehnat bozoriga 600 ming nafar yoshlarning kirib kelishini hisobga olgan holda ular ishsizligini bartaraf etish va ish o‘rinlari istiqbollarini o‘zgartirish, ularni o‘qitish va kasbga manzilli tayyorlash yo‘nalishida hamkorlikdagi loyihalarni amalga oshirish yuzasidan fikr almashilgan. 

Koreya Respublikasi bandlik va mehnat vaziri Li Jun Sikning iyul oyida O‘zbekistonga tashrifi chog‘ida erishilgan kelishuvlarni, xususan, tegishli vazirliklari o‘rtasida hamkorlik to‘g‘risidagi memorandumning imzolanishi ikki tomonlama munosabatlarni yangi bosqichga olib chiqishi ta’kidlangan.

Uchrashuv yakunida ushbu memorandumni amalga oshirish bo‘yicha bosqichma-bosqich “yo‘l xaritasi”ni ishlab chiqish, jumladan, qo‘shma treninglar o‘tkazish, statistik ma’lumotlar va mutaxassislar almashinuvini tashkil etish bo‘yicha kelishuvga erishilgan.