Amaliy tashrif bilan Janubiy Koreyada bo‘lib turgan Senat raisi Tanzila Norboyeva Milliy Assambleya Spikeri Kim Chjin Pxyo bilan muzokara o‘tkazdi.
Uchrashuvda O‘zbekiston va Janubiy Koreya o‘rtasidagi do‘stlik hamda alohida strategik sheriklik munosabatlarini yanada mustahkamlash, savdo-iqtisodiy, investitsiyaviy, madaniy-gumanitar, ayniqsa parlamentlararo aloqalarni kengaytirish masalalari muhokama qilingan. Shuningdek, O‘zbekiston va Koreya hududlararo hamkorligini kengaytirish, xususan mahalliy kengashlar o‘rtasida aniq chora-tadbirlar ko‘rsatib o‘tilgan qo‘shma dasturni qabul qilish orqali hududlardagi deputatlar o‘rtasida yaqin aloqalar o‘rnatish yuzasidan ham fikr almashilgan.
Koreya O‘zbekistonning Osiyo-Tinch okeani mintaqasidagi yetakchi savdo-iqtisodiy sheriklaridan biri hisoblanadi. Shu nuqtai nazardan savdo-iqtisodiy aloqalarni rivojlantirish eng ustuvor vazifa hisoblanadi. Oxirgi 5 yilda tovar aylanmasi ikki baravar oshgan. 2022 yilda o‘zaro tovar ayirboshlash hajmi 23,3 foizga o‘sgan va 2,34 mlrd dollarni tashkil qilgan.
Muzokaralar chog‘ida 2025 yilga borib mazkur ko‘rsatkichni 5 mlrd dollarga yetkazish uchun katta imkoniyatlar mavjudligi aytib o‘tilgan. Xususan, qator qo‘shma loyihalarni amalga oshirish, jumladan, ishlab chiqarish korxonalarini zarur infratuzilma bilan ta’minlash, noyob metallarni o‘zlashtirish, shuningdek, yuqori tezlikda harakatlanish imkonini beruvchi yo‘llar barpo etish borasida hamkorlikni kuchaytirish lozimligi ta’kidlangan.
Bundan tashqari, madaniy-gumanitar aloqalar ham tomonlarning diqqat markazida bo‘lib, ta’lim va kadrlar tayyorlash yo‘nalishlaridagi qo‘shma dasturlarni amaliy mazmun bilan boyitish takliflari ilgari surilgan.
