Maldivning yangi prezidenti orollardan Hindiston qo‘shinini chiqarib yuborishga va’da berdi

“Maldiv yerlarida xorijlik harbiylarning qadam bosishini istamaymiz... Men Maldiv xalqiga shunday deb va’da berganman va o‘z va’damni birinchi kundanoq bajaraman”, – dedi saylangan prezident BBCga bergan intervyusida.

Muizzu noyabr oyi oxirida prezidentlik lavozimiga kirishadi. Uning so‘zlariga ko‘ra, u saylovda g‘olib chiqqanidan keyin bir necha kun o‘tib hind elchisi bilan uchrashgan va unga “Hindiston harbiylarining mutlaq hammasi olib ketilishi kerakligini aniq qilib aytgan”.

Maldiv – uzoq vaqtdan buyon Hindistonning ta’sir doirasidagi davlat. Mamlakatning yangi rahbari qo‘yayotgan talab katta ehtimol bilan Male va Dehli o‘rtasida diplomatik taranglikka sabab bo‘ladi.

Muhammad Muizzuning saylovda g‘olib chiqishi Hindiston uchun muvaffaqiyatsizlik deb ko‘rilmoqda. Uning raqibi – amaldagi prezident Muhammad Solih 2018 yilda bu lavozimni egallaganidan buyon mamlakatni Hindistonga yaqinlashtirgan edi.

Muizzuni qo‘llab-quvvatlayotgan partiyalar koalitsiyasi Solihning “birinchi o‘rinda Hindiston” qabilidagi siyosatini Maldivning suvereniteti va xavfsizligiga tahdid deb hisoblaydi. Solihning o‘zi bu ayblovlarni bo‘rttirilgan deb atagan.

Yangi prezidentning tarafdorlari Xitoy bilan yaqinlashishni qo‘llab-quvvatlaydi. Pekin Maldiv orollariga infratuzilma va taraqqiyot loyihalari uchun qarzlar va grantlar shaklida yuzlab million dollar investitsiya kiritgan. Muhammad Muizzu xitoyparast ekani haqidagi tanqidlarga javoban, Maldiv orollarining manfaatlari va mustaqilligini birinchi o‘ringa qo‘yishini aytgan. “Men hech bir davlatga xayrixoh yoki qarshi emasman”, degan u.

Ayni paytda Hindiston tomonidan Maldivga yotqizilgan sarmoyalar hajmi ham 2 mlrd dollardan oshadi. Dehli Hind okeanining muhim qismini monitoring qilish imkonini beruvchi strategik joylashuvga ega orollarda o‘z ta’sirini saqlab qolishdan manfaatdor. Agar qo‘shinlarini olib chiqib ketishga majbur bo‘lsa, bu Hindiston tashqi siyosati uchun muvaffaqiyatsizlik bo‘ladi.