Rossiya Adliya vazirligi yana besh kishini «chet el agentlari» reyestriga kiritdi

Rossiya Adliya vazirligi 3 noyabr, juma kuni «chet el agentlari» reyestrini yana kengaytirdi. Idora saytidagi xabarga ko‘ra, ro‘yxatga yana besh kishi kiritildi. 

«Chet el agenti» maqomi jurnalist, tele va radioboshlovchi Dmitriy Gubinga, «Dojd» sobiq muxbiri va «Xodorkovskiy LIVE» Youtube-kanali boshlovchisi Dmitriy Yelovskiyga, publitsist va Agentura.ru nashri bosh muharriri Andrey Soldatovga, siyosatshunos Mariya Snegova, shuningdek, huquqshunos va sobiq tergovchi Kirill Kachurga berildi.

Adliya vazirligi ma’lumotlariga ko‘ra, ro‘yxatga kiritilgan shaxslar Ukrainadagi «maxsus harbiy operatsiya»ga qarshi bo‘lgan yoki Rossiya hukumati tomonidan qabul qilingan qarorlar va Rossiya Qurolli kuchlarining harakatlari to‘g‘risida «noto‘g‘ri ma’lumot» tarqatgan yoxud Rossiya va qurolli kuchlarning salbiy imijini yaratishga qaratilgan harakatlarni sodir etgan. Xabar qilinishicha, ular Rossiya Federatsiyasidan tashqarida yashaydi. Kachurdan tashqari hammasi boshqa «chet el agentlari» tomonidan yaratilgan materiallarni tarqatishda ham qatnashgan, deya ta’kidlaydi mahkama. 

Shu bilan birga, Adliya vazirligi tomonidan Oltoy Respublikasidagi «Tuba kalik» mintaqaviy milliy-madaniy jamoat tashkiloti tugatilgani sababli «chet el agentlari» reyestridan chiqarildi. 

Rossiyada «chet el agentlari» to‘g‘risidagi qonun 

Rossiyada «chet el agentlari» to‘g‘risidagi qonun 2012 yilda paydo bo‘lgan. O‘shandan beri bir necha yuzlab tashkilotlar va shaxslar taqiq ro‘yxatiga kiritilgan. Jismoniy shaxslar – «chet el agentlari» reyestri 2022 yil aprel oyi boshida ishga tushirilgan bo‘lib, u NNTlar – «chet el agentlari», OAV – «chet el agentlari» va ro‘yxatdan o‘tmagan tashkilotlar – «chet el agentlari» ro‘yxati bilan bir qatorda to‘rtinchi ro‘yxat bo‘ldi. 2022 yil dekabr oyidan boshlab qonun, Rossiya rasmiylariga ko‘ra, «chet eldan yordam oladigan» va «xorijiy ta’sir ostida» bo‘lganlarni «chet el agentlari» deb e’lon qilish imkonini beradi.