Dumada Ukraina yerlarini urush qatnashchilariga berish taklif qilindi

Rossiya Davlat dumasi deputati Aleksey Juravlev Rossiya tomonidan egallab olingan hududlarda rossiyaliklarga yer berish to‘g‘risidagi qonun loyihasini ishlab chiqmoqda. Uning fikriga ko‘ra, Ukrainadagi urushning bevosita ishtirokchilari o‘zini mustaqil deb e’lon qilgan «DXR» va «LXR», shuningdek, Xerson va Zaporijjya viloyatlarining bosib olingan qismlarida yerni ustuvor tartibda sifatida olishi kerak. Bu haqda 5 noyabr kuni «Kommersant» gazetasi xabar berdi. 

«Men Rossiya maxsus operatsiyasi ishtirokchilari uchun «Sharqiy Ukraina gektarlari» dasturining paydo bo‘lishini talab qilgan bo‘lardim. Aytgancha, Rossiya allaqachon 100 million gektardan ko‘proqqa kengaytirilgan va bizning g‘alabamizdan keyin kimdir uni bo‘lishi kerak. Uzoq Sharqda va Arktikada mamlakatning har bir fuqarosi gektarga da’vo qilishi mumkin, ammo «DXR», «LXR», Zaporijjya va Xerson viloyatlarida men hududlarni to‘g‘ridan to‘g‘ri ularning ozod etilishida ishtirok etganlar o‘rtasida taqsimlashni taklif qilaman», dedi nashrga «Rodina» partiyasi rahbari Juravlev.

Donetsk va Luhansk «xalq respublikalari»

Donetsk va Luhansk «xalq respublikalari» 2014 yil aprelida rossiyaparast ayirmachilar tomonidan egallab olingan hududlarda tuzilgan. Ular o‘sha yilning 12 mayida bir kun avval o‘tkazilgan, BMTga a’zo birorta davlat tomonidan tan olinmagan «referendumlar» natijalariga ko‘ra o‘z «suvereniteti»ni e’lon qildi. Rossiya ushbu ovoz berish natijalarini hurmat qilishini e’lon qildi, ammo de-yure buni tan olmadi.

Ukraina qonunchiligiga ko‘ra, rossiyaparast ayirmachilar nazorati ostidagi hududlar Rossiya tomonidan vaqtincha ishg‘ol qilingan deb hisoblanadi. «DXR» va «LXR» tuzilmalarining mustaqilligi Rossiya tomonidan tan olingan, buni Rossiya prezidenti Vladimir Putin 2022 yil 21 fevraldagi telemurojaatida e’lon qilgan.