Italiyada hibsga olingan «Putinning yaxtasi» qo‘yib yuborilishi mumkin

Rossiya prezidenti Vladimir Putinniki ekani aytilayotgan va Italiyada hibsga olingan «Shahrizoda» (Scheherazade) yaxtasi yana suvga tushirildi. Bunga birinchi bo‘lib sohaga oid eSysman SuperYachs kanali e’tibor qaratdi.

Mutaxassislar ma’lumotiga ko‘ra, yaxta 2022 yil fevralida Rossiyaning Ukrainaga to‘liq miqyosli bosqinidan keyin Marina di Carrara portida saqlanayotgan edi. Kanal egalarining qayd qilishicha, ular shu vaqt mobaynida 4 marta portga borishgan va yaxta Italiya kemasozlari tomonidan ta’mirlanayotganini ko‘rishgan. 

«Shahrizoda» yaxtasi «Putinga tegishli ekani»ni rossiyalik muxolifatchi Aleksey Navalniy jamoasi o‘z surishtiruvidan so‘ng e’lon qilgan. Yaxtada xizmat qiluvchi xodimlarning barchasi ruscha ism familiyaga ega bo‘lgani va ularning deyarli barchasi Rossiya Federal muhofaza xizmati (FSO) bilan aloqador ekani, yaxtani qurish uchun 583,1 million yevro sarflangani aniqlangani aytilgan.

2022 yil may oyida yaxta Italiya hukumati tomonidan hibsga olindi. Moliya politsiyasi xabariga ko‘ra, «yaxtaning haqiqiy egasi bilan Rossiya hukumatining taniqli vakillari o‘rtasida muhim iqtisodiy va biznes aloqalari mavjudligi» aniqlangan.

Aleksey Navalniy tomonidan asos solingan Korrupsiyaga qarshi kurashish jamg‘armasi (FBK) surishtiruv bo‘limi boshlig‘i, Anti-Corruption Foundation (ACF) raisi Mariya Pevchix ijtimoiy tarmoqda Italiya hukumatiga murojaat qildi.

«Agar Italiya hukumati qandaydir sababga ko‘ra «Shahrizoda»ni qo‘yib yuborsa, bu eng katta sharmandalik bo‘ladi. Bu Yevropa Ittifoqining sanksiyalar siyosatiga eng jiddiy zarba bo‘ladi. Bunday bo‘lmasligi kerak. Putinga yaxtasini qaytarib bermang, bunga aql bovar qilmaydi», dedi Pevchix.