«Agenstvo»: Rossiyada qotillikda ayblangan 17 kishi afv etildi

Rossiyada 2022 va 2023 yillarda qotillikda ayblangan kamida 17 kishini afv etildi. «Agenstvo»ning 9 noyabr, payshanba kuni e’lon qilingan materialiga ko‘ra, afv etilganlarning barchasi Ukrainaga qarshi urushda qatnashib, keyin ozodlikka chiqqan, ba’zilari esa qaytib kelgach, yana jinoyat sodir etgan.

Kemerovoda yashovchi Vladislav Kanyusning ozod etilishi eng rezonansli voqealardan biri bo‘ldi, u o‘zining sobiq tanishi Vera Pextelevani shafqatsizlarcha o‘ldirib, unga yuzdan ortiq jarohatlar yetkazgan. Qotillik paytida qo‘shnilar qizning qichqirig‘ini eshitib, bir necha bor politsiyaga qo‘ng‘iroq qilgan, ammo politsiya kelmagan. Politsiyachilar o‘z ishiga beparvolik bilan yondashgani uchun shartli qamoq jazosini oldi, 17 yilga qamalgan qotil esa Ukrainaga urushga ketgan va Rossiyaga ozod shaxs bo‘lib qaytgan.

Qotillikda ayblangan va afv etilganlar orasida 23 yoshli Tatyana Rekutinani zo‘rlab o‘ldirgan Perm o‘lkasida yashovchi Artem Buchin; o‘zining 33 yoshli tanishi Olga Shlyaminani o‘ldirib, jasadini bo‘laklab tashlagan Arxangelsk viloyatida yashovchi Vyacheslav Samoylov; 27 yoshli tanishi Tatyana Melexinani bo‘g‘ib o‘ldirgan Perm viloyatida yashovchi Dmitriy Zelenskiy; ukasi bilan birga 19 yoshli Mariya Nechetnayani kaltaklab o‘ldirgan obninsklik Vladislav Korobeynikov ham bor.

Ba’zilar urushdan qaytgach, yana jinoyat sodir etgan, masalan, Kirov viloyatidan bo‘lgan Ivan Rossomaxin, agar afv bo‘lmasa, qotillik va talonchilik uchun 14 yillik qamoq jazosini o‘tashi kerak edi: urushdan qaytgach, u qishloqdoshi, 85 yoshli Yuliya Buyskixni pichoqlagan. «Agenstvo» ma’lumotlariga ko‘ra, Ukrainadagi urushdan qaytgan rossiyaliklar kamida 20 ta jinoyat sodir etgan, buning natijasida 27 kishi halok bo‘lgan.

Nashr jurnalistlarining ta’kidlashicha, aslida urushda qatnashgani uchun afv etilgan qotillar ko‘p. Ularning ko‘plari frontda halok bo‘ldi, boshqalarining holatlari rezonansga olib kelmadi. Bundan tashqari, deya yozadi «Agenstvo», mahkumlar maxfiy farmonlar bilan afv etilyapti.