AQSh davlat kotibi Ukrainaga qishda yordam taqdim etilishiga va’da berdi

AQSh davlat kotibi Entoni Blinken Ukraina prezidenti devoni rahbari Andrey Yermak bilan uchrashuv chog‘ida Kiyevga qishda Rossiyaning mamlakat fuqarolik infratuzilmasini o‘qqa tutishi ehtimolini bartaraf etishda yordam taqdim etishga va’da berdi. Bu haqda 13 noyabr, dushanba kuni AFP xabar qilgan.

«Ukraina hukumati bilan bo‘lgan barcha suhbatlarimizda ularni qo‘llab-quvvatlashda davom etishimizni ochiq aytyapmiz», - dedi Davlat departamenti vakili Metyu Miller muzokaralar haqida. Uning so‘zlariga ko‘ra, Blinken Yermak bilan Vashington va Kiyev birgalikda Ukraina infratuzilmasini kelgusi qish uchun mustahkamlashda qilishi mumkin bo‘lgan qadamlarni muhokama qilgan. 

«Albatta, biz o‘tgan qishda Rossiya Ukrainadagi energetika obektlarini qanday yo‘q qilishga uringanini ko‘rdik. Ular buni yana qilishi mumkin», - dedi Miller. 

Yermak: Ukraina qishda havo mudofaasiga muhtoj 

Yermak Blinken bilan uchrashuvni «muhim va samarali» deb atadi hamda «AQSh prezidenti Jo Bayden ma’muriyati, AQSh Kongressining ikkala palatasi va butun Amerika xalqiga misli ko‘rilmagan yordami uchun» minnatdorchilik bildirdi. 

«Qish yaqinlashar ekan, biz Rossiya raketa hujumi kuchayishini kutmoqdamiz. Shuning uchun haqiqatan ham Ukraina shaharlarini, muhim infratuzilma obektlarini, shuningdek, «don yo‘lagi» yo‘llarini himoya qiladigan havo mudofaasi va raketaga qarshi mudofaa tizimlari kerak», deb yozadi Yermak Telegram-kanalida. 

Amerikaning Ukrainaga yordamini moliyalashtirish bilan bog‘liq muammolar 

Oq uy respublikachilar bilan Ukrainaga harbiy yordamni moliyalashtirishni davom ettirish borasida haligacha kelisha olmayapti. Oktyabr oyi oxirida respublikachilar ko‘pchilik bo‘lgan Vakillar palatasi Ukrainaga yordam ko‘rsatmasdan Isroilga yordam berish uchun 14,3 milliard dollar ajratish haqidagi qonun loyihasini qo‘llab-quvvatladi. O‘z navbatida, demokratlar ustunlikka ega bo‘lgan Senat qonun loyihasini blokladi. 

Shu bilan birga, AQSh rasmiylari Kongress tomonidan tasdiqlangan 60 milliard dollarning taxminan 96 foizini Ukrainaga yordam berish uchun sarflab bo‘lgan.