O‘zbekiston va BMTning Kosmos boshqarmasi o‘zaro aloqalarni jadallashtiradi

O‘zbekistonning Avstriyadagi elchisi Baxtiyor Ibragimov BMTning Kosmos masalalari bo‘yicha boshqarmasi (UNOOSA) direktori Arti Xoll-Mayn bilan uchrashuv o‘tkazdi.

«Dunyo» xabariga ko‘ra, muloqot chog‘ida UNOOSA'ning kosmik tadqiqotlar sohasidagi turli dastur va tashabbuslari hamda global muammolarni hal qilishda kosmik texnologiyalarning roli xususida fikr almashildi.

Tomonlar UNOOSA va O‘zbekiston Raqamli texnologiyalar vazirligi huzuridagi «O‘zbekkosmos» agentligi o‘rtasidagi o‘zaro aloqalarni jadallashtirish, qishloq xo‘jaligi, o‘rmonlarni kesish bilan bog‘liq harakatlarni oldini olish va noqonuniy qazib olishga qarshi kurash kabi sohalarda hamkorlikning mavjud salohiyatini muhokama qildilar.

Uchrashuvda, shuningdek, Orol dengizining qurishi bilan bog‘liq masalalar, qishloq xo‘jaligi mahsuldorligini oshirish, atrof-muhit monitoringi, suv resurslarini tahlil qilish va cho‘llanishga qarshi kurashish cingari ekologik muammolarni hal qilishda kosmik texnologiyalardan foydalanish bo‘yicha hamkorlik istiqbollariga e’tibor qaratildi.