Rossiya Federatsiyasiga «ov miltiqlariga o‘rnatish uchun» olib kelingan g‘arbda ishlab chiqarilgan nishonga olish moslamalari Ukrainada rus harbiylari tomonidan faol foydalanilmoqda, deb yozadi «Vajnyye istorii».
Ukrainada keng ko‘lamli urush boshlanganidan beri Rossiyaga snayper miltiqlari uchun g‘arbda ishlab chiqarilgan 16 milliard rubllik nishonga olish moslamalari olib kelingan. Bu haqda 26 dekabr kuni Rossiya bojxona ma’lumotlariga tayanib, «Vajnyye istorii» nashri xabar berdi.
Rasmiy ma’lumotlarga ko‘ra, nishonga olish moslamalari Rossiya Federatsiyasiga «harbiy maqsadlarda emas, balki ov qurollariga o‘rnatish uchun» olib kelinadi. Nashr ta’kidlaganidek, YouTube’da e’lon qilingan ko‘plab videolar shuni ko‘rsatadiki, bu nishonga olish moslamalarining bir qismi – Amerikaning Leupold va Nightforce, Amerika-Xitoyning Holosun va Avstriyaning Swarowski Optik - Rossiya harbiylari tomonidan Ukrainadagi frontda foydalanilyapti.
Nishonga olish moslamalari parallel import orqali olib kirilyapti
Eng ko‘p nishonga olish moslamalari mamlakatga Rossiyaning internet-do‘konlari - Peterburgdagi «Pointer» va Moskvadagi «Navigator» tomonidan import qilingan. Birinchisi qariyb 50 mingga yaqin Holosun moslamalarini 3 milliard rublga sotib olgan, ikkinchisi 400 million rublga nishonga olish moslamalarini import qilgan, shu jumladan 2 mingdan ortiq Holosun olib kelingan. «Pointer» Xitoyda, «Navigator» esa Turkiya va Qozog‘istonda vositachilardan foydalanadi, deb yozadi «Vajnyye istorii».
So‘nggi ikki yil ichida «Pointer»dan Rossiyaning Orsis miltiqlarini ishlab chiqaruvchi «Promtexnologiya», shuningdek, Bespoke Gun miltiqlarini ishlab chiqaruvchi Moskva shirkati tomonidan o‘n millionlab rubllik nishonga olish moslamalari sotib olindi. Ikkinchisi «Navigator»dan ham mahsulot xarid qilgan. Bundan tashqari, «Vagner» XHKning marhum egasi Yevgeniy Prigojin bilan bog‘liq bo‘lgan Sankt-Peterburgdagi «Texnologiya» kompaniyasi uning mijozi edi. «Navigator»ning yana bir mijozi Lobaev Arms miltiqlarini ishlab chiqaruvchi Integratsiyalashgan tizimlar konstruktorlik byurosi bo‘lgan.
