Rossiyada bir yil ichida xizmatdan qochish bo‘yicha 5000 dan ortiq ish sudga topshirildi

O‘tgan yil davomida Rossiya harbiy sudlari harbiy qismni ruxsatsiz tark etish bo‘yicha 5024 ta ish oldi (Rossiya Federatsiyasi Jinoyat kodeksining 337-moddasi). Bu ma’lumotlar «Mediazona» tomonidan 29 dekabr, juma holatiga ko‘ra to‘plangan. «Xizmatdan qochish holatlari soni mutlaq tarixiy rekordga aylandi», deb ta’kidlaydi nashr. «Mediazona» hisob-kitoblariga ko‘ra, 2022 yilda Rossiya Ukrainaga kirganida atigi 1001 ish ko‘rib chiqilgan, undan bir yil avval - 615 ish bo‘lgan.

Dezertirlik to‘g‘risidagi yanada qat’iyroq moddaga (Rossiya Federatsiyasi Jinoyat kodeksining 338-moddasi) ko‘ra, 2023 yilda sudlarga 148 ta ish yuborilgan, bu bir yil avvalgidan olti barobar ko‘pdir, deb yozadi «Mediazona». 

Nashr tomonidan taqdim etilgan jadvalga ko‘ra, 2023 yil oxiriga kelib, harbiy sudlar «barqaror sur’at»ga erishdi - oyiga harbiy qismni ruxsatsiz tark etish bo‘yicha 500 ta hukm, ya’ni haftasiga yuzdan ortiq qaror chiqarildi. «Mediazona» ta’kidlashicha, uning tahlilida «harbiylar frontga qayta yuborilishi bo‘yicha» shartli hukmlarning katta qismi aniqlandi.

Dezertirlikka rozi bo‘lganlar soni ham ortdi

Oxirgi oylarda Ukrainada jang qilayotgan rossiyalik askarlardan dezertirlikni tashkil etish xizmatlariga murojaat qilish soni ortgan. Shu tariqa, agar 2023 yilning yozida urushda qatnashmaslikka yordam beradigan «Idite lesom» tashkilotiga 305 ta shunday so‘rov tushgan bo‘lsa, kuz oylarida ularning soni 577 taga yetdi, deb yozadi The Moscow Times gazetasi 5 dekabr kuni. 

2023 yil aprel oyidan beri «Idite lesom» yuristlari va ko‘ngillilari armiyadan qochishga uringan 1000 dan ortiq harbiy xizmatchilarga maslahat berdi; eng ko‘p qochishga urinishlar oktyabr oyida (218 ta holat), eng kami iyun oyida (54 ta holat) qayd etilgan. Tashkilot rahbari Grigoriy Sverdlin so‘zlariga ko‘ra, harbiy xizmatchilarning ko‘pchiligi yaralanganidan keyin dezertir bo‘lishga qaror qilgan. 

Urushdan qochishda qo‘lga tushish ehtimoli yuqori 

«Grajdanin. Armiya. Pravo» huquqni himoya qilish guruhi direktori Sergey Krivenkoning aytishicha, qo‘lga tushish ehtimoli juda yuqori bo‘lganligi uchun juda kam odam jangovar harakatlar zonasidan qochishga qaror qiladi. «Harbiy patrullar hudud bo‘ylab yurib, qochqinlarni ushlaydi. Qochqinlar, odatda, dala gauptvaxtasiga, keyin - yana frontga jo‘natiladi. Ish ko‘pincha sudgacha yetib bormaydi», - deya tushuntirdi u. 

Krivenko, shuningdek, «Idite lesom»ning dezertirlik holatlari ko‘payganligi haqidagi ma’lumotlarini tasdiqladi va buni safarbarlik boshlanganidan beri o‘tgan yil davomida askarlarda ma’lum xizmat muddatidan keyin uyga qaytish bo‘yicha xom xayollari yo‘qolgani bilan izohladi.