Rossiya aviakompaniyalari 50 yillik «An» samolyotlari xizmat muddatini uzaytirishni so‘radi

Sibirdagi ikki aviakompaniya Rossiya hukumatidan 50 yildan ortiq foydalanilgan An-24 va An-26 sovet samolyotlarining xizmat muddatini uzaytirishni so‘radi, deb xabar berdi Reuters 11 yanvar kuni. Shu tariqa, Rossiya aviasanoati yangi samolyotlar va ular uchun ehtiyot qismlari yetkazib berishni taqiqlagan g‘arb sanksiyalari natijasida yuzaga kelgan taqchillikni bartaraf etishga harakat qilmoqda, deya ta’kidlaydi agentlik. 

«Angara» aviakompaniyasi bosh direktori Sergey Zorinning so‘zlariga ko‘ra, gap 100 ga yaqin «Antonov» samolyotlari haqida ketmoqda: hozirda ular parvoz qilmoqda, biroq ba’zilari joriy yilda hisobdan chiqarilishi kerak. 2030 yilgacha ushbu samolyotlarning to‘rtdan bir qismini foydalanishdan olish rejalashtirilgan. 

G‘arb sanksiyalari sharoitida parvozlar 

«Antonov» vintli samolyotlari 50 nafargacha yo‘lovchini sig‘dira oladi hamda Sibir va Uzoq Shimol sharoitida uchishga yaxshi moslashgan. Ular -55 darajagacha bo‘lgan haroratga bardosh bera oladi. Mashinalar 1950-yillarda ishlab chiqilgan va 1960-yillarda Kiyevdagi aviazavodda ishlab chiqarilgan, biroq ishlab chiqarish so‘nggi 10 yil davomida to‘xtatilgan. 

Rossiya aviakompaniyalari rahbarlari, uchuvchilari va aviasanoat mutaxassislari g‘arb sanksiyalari va dvigatellar uchun zarur ehtiyot qismlari hamda butlovchi qismlarning yo‘qligi sharoitida ularga texnik xizmat ko‘rsatish xarajatlari sezilarli darajada oshishini ta’kidlamoqda. Biroq, hozircha ularning o‘rnini bosadigan hech narsa yo‘q, deydi «Polyarnyye avialinii» texnik direktori vazifasini bajaruvchi Aleksey Yevseyev. «An-24 va An-26 Yoqutistonda yo‘lovchi va yuk tashishning yagona vositasi bo‘lgan va shunday bo‘lib qolyapti», - deya ta’kidladi u. 

Rossiyaning Ukrainaga qarshi urushi boshlanganidan keyin Yevropa Ittifoqi Rossiya Federatsiyasiga samolyotlar va ehtiyot qismlari yetkazib berishni, shuningdek, ularga texnik xizmat ko‘rsatish va sug‘urta qilishni taqiqladi. Qo‘shma Shtatlar aviatsiya sanoati tovarlari eksportini ham cheklab qo‘ydi va «Aeroflot» laynerlari hamda boshqa Rossiya aviakompaniyalariga nisbatan sanksiyalar kiritdi.