Toshkent xalqaro aeroporti nazoratchisi tezkor tadbirda ushlandi

U aeroportning Aviatsiya xavfsizlik xizmati qo‘riqlash nazoratchilar bo‘linmasiga nazoratchi sifatida ishga kiritib qo‘yish evaziga fuqarodan 2 ming AQSh dollari talab qilgan. Sud hukmi bilan nazoratchiga 2 yil ozodlikni cheklash jazosi tayinlangan.

Toshkent xalqaro aeroportining Aviatsiya xavfsizlik xizmati qo‘riqlash nazoratchilar bo‘linmasi nazoratchisi tezkor tadbirda qo‘lga olindi.

Ma’lum qilinishicha, nazoratchi A.B. xizmat mavqeyidan foydalangan holda o‘zganing ishonchiga kirib, uning pul mablag‘ini noqonuniy tarzda o‘zlashtirishni reja qilgan. Dastlab u ijtimoiy tarmoq orqali jabrlanuvchi bilan tanishgan va uning qarindoshini Toshkent xalqaro aeroportining Aviatsiya xavfsizlik xizmati qo‘riqlash nazoratchilar bo‘linmasiga nazoratchi sifatida ishga kiritib qo‘yish evaziga 2 ming AQSh dollari talab qilgan. Ammo jabrlanuvchi 1 800 dollar berishini bildirgan.

2023 yilning 6 dekabr kuni DXX va Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda A.B. 1 800 AQSh dollarini olgan vaqtida ashyoviy dalillar bilan ushlangan.

Holat yuzasidan A.B.ga nisbatan Jinoyat kodeksining 25, 168-moddasi va 28, 211-moddasi bilan jinoyat ishi qo‘zg‘atilgan. Jinoyat ishlari bo‘yicha Mirobod tuman sudi hukmi bilan A.B.ga nisbatan 2 yil muddatga ozodlikni cheklash jazosi tayinlangan.