Checheniston rahbari o‘zi yashaydigan hududdagi odamlarning qarzlarini to‘lab qo‘yishini aytdi va boshqalarga ham shuni tavsiya qildi.
Checheniston rahbari Ramzon Qodirov amaldorlarni mahalliy aholining oziq-ovqat do‘konlarida to‘plangan qarzlarini to‘lab qo‘yishga chaqirdi. U ijtimoiy-iqtisodiy rivojlantirish masalalariga bag‘ishlangan kengaytirilgan yig‘ilishda tegishli tashabbus bilan chiqdi.
«Men Hadijatdan (Hadijat Qodirova, Ramzonning qizi, Checheniston hukumati va ma’muriyati rahbari o‘rinbosari) SMS oldim, ko‘p odamlar moliyaviy imkoniyat yo‘qligi sababli tovarlarni qarzga olishga majbur bo‘lmoqda ekan. Ularni yopishga yordam berish yaxshi ish bo‘lardi. Hamma o‘z hududidagi qarzlarni zimmasiga olib, to‘lab yuborsa yaxshi bo‘lardi. Men o‘zim yashayotgan hududda mavjud bo‘lgan qarzlarni to‘layman», dedi u chechen tilidagi videomurojaatida.
Checheniston rasmiylari Qodirovning so‘zlarini olqishlar bilan kutib oldi.
«RIA Novosti» agentligining qayd etishicha, Chechenistonda mahalliy aholi kichik do‘konlardan oziq-ovqatni qarzga olish amaliyoti mavjud. Odamlar oziq-ovqatni, qoida tariqasida, hamma bir-birini taniydigan va ishonch darajasi yuqori bo‘lgan yaqin do‘konlardan olishadi.
Qarzlarni yopish g‘oyasi Checheniston uchun yangilik emas. Yuqori daromadli odamlar kambag‘allarga bir necha bor yordam bergan, shu jumladan Qodirovning chaqirig‘idan keyin ham. Ayniqsa, Ramazon oyida savob umidida bunday amallar ko‘p qilinadi.
Qodirov ilgari ham bunday chaqiriqlar bilan amaldorlarga murojaat qilgan. Jumladan, 2019 yilda odamlarning tabiiy gazdan qarzini, 2021 yilda do‘konlardagi qarzini to‘lashni tavsiya qilgan.
