Las-Vegasdagi portlash: haydovchi amerikaliklarga xat qoldirgan

Las-Vegasdagi Donald Trampga tegishli mehmonxona oldida Cybertruck mashinasi portlagani haqida xabar berib, uning noodatiy ekanini aytgandik. Chindan bu ishning orqasidan ko‘pchilik kutmagan narsalar chiqmoqda. Ma’lum bo‘lishicha, Tesla elektrokarini ijaraga olgan 37 yoshli Metyu Livelsberger portlashni atay uyushtirgan. Portlashdan avval mashina ichida o‘z joniga qasd qilgan. Bu ishni amerikaliklar e’tiborini o‘ziga qaratish uchun qilib, ularga xatlar qoldirgan.

Maxsus kuchlar zobiti

Vegasdagi portlagan mashina ichida bo‘lgan haydovchi jasadi tanib bo‘lmaydigan darajada kuyib ketgan. Biroq uning yonidan chiqqan hujjatlar haydovchi 37 yoshli harbiy Metyu Alan Livelsberger ekanini ko‘rsatgan. Keyinchalik tibbiy ekspertiza ham jasad aynan shu harbiyniki ekanini tasdiqlagan. Livelsberger AQSh armiyasi maxsus kuchlari safida katta serjant ekani aniqlandi. O‘z joniga qasd qilgan kuni ta’tilda bo‘lgan.

Metyu 28 dekabr kuni Denverda kibertrak ijaraga olib Las-Vegasga yo‘l oladi. Yo‘l-yo‘lakay bir nechta shaharlarda to‘xtab o‘tadi. 30 dekabr kuni ikkita yarimavtomat sotib oladi. 1 yanvar tongda Las-Vegasga yetib boradi va mahalliy vaqt bilan soat 08:40 atrofida Trump International mehmonxonasi oldida to‘xtab, o‘zini boyagi sotib olgan qurol bilan otib o‘ldiradi. Shu vaqt mashinada yong‘in boshlanib, portlaydi.

37 yoshli harbiy 2006 yildan buyon AQSh armiyasi maxsus kuchlari safida xizmat qilib kelgan. Ukrainada, Gurjistonda, Kongoda xizmat qilgan, Afg‘onistondagi beshta harbiy missiyada ishtirok etgan. Oxirgi ish joyi Germaniya bo‘lgan.

U respublikachi Donald Trampni qo‘llab-quvvatlagan. Hatto birinchi xotini Sara bilan 2016 yildagi saylovlarda fikri bir joydan chiqmagani uchun ajrashgan. O‘shanda Sara Berni Sandersga, Metyu esa Donald Trampga ovoz bergan. Safdoshlari uni juda sodiq harbiy deb ta’riflagan, shuningdek, vatanparvar ekani, siyosatga qiziqishini ta’kidlagan. Harbiy ijtimoiy tarmoqdagi sahifasida ko‘plab siyosiy postlar joylagan.

Metyu o‘z joniga qasd qilishidan ikki hafta avval ikkinchi xotini bilan ham ajrashgan. Juvon erini xiyonat qilishda ayblagan. Yangi yil arafasida esa erkak sobiq ma’shuqasi bilan yozishib, unga kibertrakning suratlarini yuborgan. Ayolning aytishicha, Metyu o‘shanda yaxshi kayfiyatda bo‘lgan va unda o‘z joniga qasd qilish alomatlari sezilmagan.

«Amerika qulamoqda»

Endi bu hodisadagi eng muhim joyiga yetib keldik. Metyu Livelsberger yonida amerikaliklarga xat qoldirgan. Mashinani portlatishni esa ularning e’tiborini o‘ziga qaratish uchun qilganini yozgan.

«AQSh tarixdagi eng zo‘r davlat. Lekin endi davosiz dardga chalinib qulash arafasidamiz», deb yozgan yonidagi kundalikdagi qaydlardan birida harbiy. Uning fikricha, hukumatdagilar faqat boyish haqida o‘ylaydi va amerikaliklar uyg‘onishi kerak.

AQSh armiyasining iste’fodagi ofitseri, razvedkachi Sem Shumeytning aytishicha, Livelsberger o‘z joniga qasd qilishidan bir necha kun avval unga xat yozgan va uni 1 yanvar kuni jurnalistlarga berishni so‘ragan. Federal tergov byurosi va politsiya xatni chindan u yozganini tasdiqladi. Xatda aytilishicha, Xitoy AQSh chegarasida suvosti kemasidan turib uchirgan dronlar AQSh xavfsizligi uchun eng katta xavf hisoblanadi. Shuningdek, marhum harbiy AQSh hukumatini Afg‘onistondagi harbiy jinoyatlarni yashirishda ayblagan, hatto ularni yashirishda qatnashganini tan olgan.

AP Metyu Livelsbergerning yana bir xatini e’lon qildi. Unda harbiy o‘z harakatini tushuntirib bergan: «Bu – terakt emas, ogohlik qo‘ng‘irog‘i. Amerikaliklar faqat zo‘ravonlik va vahimali narsalarga e’tibor berishadi. Fikrimni ularga yetkazish uchun feyrverklar ishtirokidagi tomoshadan yaxshiroq usul bormi?» degan o‘sha xatida harbiy.

Nashrning yozishicha, Metyu xatlaridan birida «ongini yo‘qotgan safdoshlari va o‘ldirgan odamlarini o‘ylashdan» tozalashi kerakligi haqida yozgan.

Nyu Orleandagi hodisa bilan o‘xshashlik

Politsiya Las-Vegasdagi portlash va Nyu Orleandagi yangi yil oqshomida amalga oshirilgan terakt o‘rtasida bog‘liqlik yo‘q deb hisoblagan, lekin amerikaliklar bu ikki voqea o‘rtasida juda ko‘p o‘xshashliklar borligiga e’tibor qaratgan. Masalan, Nyu Orleanda odamlar ustiga IShID bayrog‘i bog‘langan mashinani haydab kamida 13 kishining o‘limiga sabab bo‘lgan Shamsuddin Jabbor va Vegasda kibertrakni portlatgan Metyu Livelsberger Shimoliy Karolinada bitta harbiy bazada xizmat qilgan, bir vaqtda Afg‘onistondagi operatsiyalarda qatnashgan, mashinalarni ham bitta servis orqali ijaraga olgan.

O‘tkir Jalolxonov tayyorladi.
Tasvirchi va montaj ustasi – Faxriddin Hotamov.