G‘arb kabellar uzilishining oldini olish uchun sun’iy intellektdan foydalanadi

Buyuk Britaniya boshchiligidagi qo‘shma ekspeditsiya kuchlari (Joint Expeditionary Force, JEF) Boltiq dengizidagi yirik Estlink2 suvosti kabeliga zarar yetkazilgani haqidagi xabarlardan so‘ng dengizosti infratuzilmasiga potensial tahdidlarni va Rossiyaning soyadagi flotini kuzatish uchun ilg‘or javob tizimini faollashtirdi. Bu haqda 6 yanvar, dushanba kuni Britaniya hukumati ma’lum qildi.

JEF 10 ta davlatdan iborat.

Real vaqt rejimida monitoring

Nordic Warden operatsiyasi o‘tgan hafta boshlangan edi. Uning a’zolari sun’iy intellektdan turli manbalardan olingan ma’lumotlarni, jumladan, kemalarni avtomatik identifikatsiya qilish tizimi (AIS) va xavflarni baholash uchun foydalanadilar. JEF harakatlari NATOning sa’y-harakatlarini kuchaytiradi.

Rossiyaning soyadagi floti bir qismi sifatida aniqlangan kemalar JEF a’zolarini qiziqtirgan hududlarga yaqinlashganda ularning harakatlarini diqqat bilan kuzatib borish uchun tizimga kiritilgan. Agar xavf mavjud bo‘lsa, tizim real vaqt rejimida kuzatib boradi va darhol JEF'ga a’zo mamlakatlarga, shuningdek, NATO ittifoqchilariga ogohlantirish yuboradi.

«Hukumat bizning ittifoqchilarimiz bilan suvosti kabellari kabi muhim milliy infratuzilmani himoya qilish uchun yaqindan ishlayapti», dedi Britaniya bosh vaziri Kir Starmer. «Yevropa xavfsizligini mustahkamlash uchun JEF sammitidan so‘ng tez orada ushbu ilg‘or texnologiyani ishga tushirayotganimizdan xursandman», — deya qo‘shimcha qildi u.

Fin ko‘rfazida kabelga zarar yetkazgan langar izi topildi

Finlandiyalik tergovchilar Boltiq dengizi tubida Estoniya va Finlandiya o‘rtasidagi Estlink 2 elektr uzatish liniyasi shikastlangan joyda «o‘nlab kilometr» iz qoldirilganini aniqladilar, deb yozadi 29 dekabr kuni Reuters agentligi.

«Ushbu izning uzunligi o‘nlab kilometrni tashkil etadi», — deydi agentlikka mas’ul tergovchi Sami Paylu. Shu bilan birga, Finlandiya tergov vakilining ta’kidlashicha, langarning o‘zi hali topilmagan.

Avvalroq OAVda kabelga shikast yetkazganlikda gumon qilinib, Finlandiya huquq-tartibot idoralari xodimlari tomonidan qo‘lga olingan Eagle S tankeri surati chop etilgan edi. Ular tanker chap tomonida langarga ega emasligini ko‘rsatadi, garchi u xuddi shu kemaning oldingi fotosuratlarida mavjud.