Stokholmda avtomobil Rossiya elchixonasi darvozasiga borib urildi

Stokholm politsiyasi o‘z mashinasini Rossiya elchixonasi darvozasiga qarab haydab borgan erkakni qo‘lga oldi. U diplomatik vakolatxona hududiga «qo‘pol noqonuniy kirishga» urinishda gumon qilinmoqda, dedi 28 yanvar, seshanba kuni politsiya matbuot kotibi Daniel Vikdal.

Uning so‘zlariga ko‘ra, elchixona darvozasini buzib kirishga uringanidan keyin erkak mashinada o‘tirgan holda qolgan. Qo‘lga olingan shaxs taxminan 45 yoshda bo‘lib, unga nisbatan dastlabki tergov ochilgan.

Rossiya elchixonasi: Ukraina fuqarosi ikki marta shunga o‘xshash harakatlar sodir etgan

Voqea ortidan Rossiyaning Stokholmdagi elchixonasi ijtimoiy tarmoqdagi sahifalarida gumonlanuvchi «Shvetsiyada doimiy istiqomat qiluvchi Ukraina fuqarosi» ekanligini yozdi. U elchixonaga ham, mahalliy politsiyaga ham yaxshi tanish, chunki u 2015 va 2018 yillarda shunga o‘xshash harakatlar sodir etgan, shundan so‘ng u «ruhiy jihatdan noadekvat deb topilgan» va «Shvetsiya rasmiylari tomonidan tegishli davolanish uchun yuborilgan», deyiladi xabarda.

«So‘nggi paytlarda u yana Stokholmdagi Rossiya xorijiy vakolatxonalariga qarshi provokatsion harakatlarni amalga oshira boshladi», deb yozadi rossiyalik diplomatlar. Ular bu shaxs ustidan politsiya va Shvetsiya Tashqi ishlar vazirligiga shikoyat qilganliklarini, ammo jiddiy chora ko‘rilmaganini aytishdi.