O‘zbekiston | 15:17 / 30.01.2025
1899
2 daqiqa o‘qiladi

Rossiya qurilish kompaniyalari O‘zbekistondan 800 dan ortiq ishchini jalb qiladi

O‘zbekiston Bosh konsulxona xodimlari Rossiyaning yetakchi qurilish kompaniyalari rahbarlari bilan muzokara o‘tkazdi.

Foto: "Dunyo" AA

Jumladan, Sverdlovsk oblasti Verxniy Tagil shahrida joylashgan "Kurate" MChJ rahbari Aleksandr Vlaskin bilan bo‘lib o‘tgan uchrashuvda mazkur korxonaga O‘zbekistondan qonuniy asosda ishchilarni yollash imkoniyatlari xususida fikr almashildi.

Aleksandr Vlaskin o‘zi rahbarlik qilayotgan korxonada 200 nafarga yaqin ishchi kuchini jalb qilishga ehtiyoji mavjudligini bildirdi. Tomonlar mazkur bo‘sh ish o‘rinlariga hamyurtlarimizni jalb qilish bo‘yicha O‘zbekistonning tegishli idoralari bilan muzokara o‘tkazishga kelishib oldilar.

Bosh konsulxonada Sverdlovsk oblastidagi yirik ish beruvchi "SMU-30" MChJ vakillari bilan uchrashuv o‘tkazildi. Unda mazkur tashkilot hozirgi kunda 180 nafar bo‘sh ish o‘rinlari borligi ma’lum qilindi. Korxona vakillari O‘zbekiston fuqarolari o‘z ishlarining ustasi ekanligi va topshirilgan ishni vijdonan bajarishlarini inobatga olib respublikadan ishchi kuchini jalb qilishdan manfaatdorligini tasdiqladi. 

Diplomatlar, shuningdek, Tyumen oblastida "Gradiyent" qurilish tashkiloti mutasaddilari bilan muzokara o‘tkazdilar. Uchrashuvda ushbu korxonaga 100 nafar monolitchi, 100 nafar g‘isht teruvchi va 100 nafar pardozchi, jami 300 nafar mutaxassislarga ehtiyoji borligini bildirildi.

Muzokaralar yakunida ish beruvchi korxona vakillari bilan hamkorlik kelishuvi imzolandi.

Sverdlovsk oblastidagi yirik qurilish yo‘nalishida faoliyat olib boruvchi "Optimum" MChJ vakillari bilan uchrashuvda esa O‘zbekistondan 150 nafarga yaqin ishchini jalb qilish imkoniyati mavjudligi ma’lum qilindi.

Muzokaralar yakunlari bo‘yicha mazkur tashkilotlarga 830 nafar ishchi kuchini O‘zbekistondan qonuniy tartibda jalb qilish bo‘yicha dastlabki kelishuvga erishildi.

Mavzuga oid