«Siti» va Husanov «Liverpul»ni to‘xtatolmadi, Vinisius golsiz seriyasini to‘xtatdi. Kun o‘yinlari

Angliya: hozirgi «Siti» — Slot jamoasiga teng raqib emas

«Manchester Siti» — «Liverpul» 0:2
Gollar: Saloh (14), Soboslai (37).
«Manchester Siti» — Ederson, Lyuis, Husanov, Ake (Diash, 77), Gvardiol, Niko (Kovachich, 78), de Bryuyne (Makeyti, 66), Savinio, Doku, Foden, Marmush (Gundo‘g‘an, 77). 
«Liverpul» — Alisson, van Deyk, Konate, Aleksander-Arnold (Kvansa, 90+2), Roberson (Tsimikas, 74), Gravenberh, Mak Allister, Soboslai, Dias (Gakpo, 79), Jons (Endo, 74), Saloh (Elliot,  90+2).

Holand jarohatlanib safdan chiqqaniga qaramay, turning markaziy uchrashuviga «Siti» yetarlicha hujumkor tarkibda tushdi. Oldingi chiziqda bir vaqtning o‘zida Marmush, Doku, Savinio, Foden va De Bryuynega joy topildi. Bunday vaziyatda Gonsales tayanch zonasida yolg‘izdek ko‘rindi. «Liverpul»da esa ilk daqiqalardan Jons harakatlandi, u Soboslai bilan birgalikda ikki «o‘nlik»dan biri bo‘ldi. Nominal markaziy forvardlar Gakpo va Nunes zaxirada qoldirildi, ularning o‘rniga tushirilgan Dias ko‘proq chaproqda harakat qildi.

Dastlabki 13 daqiqa davomida muxlislar nisbatan teng o‘yinga guvoh bo‘lishdi, keyin esa mehmonlar burchak zarbasi ijro etish huquqiga ega bo‘lishdi va o‘ylangan kombinatsiyani amalga oshirishdi. Yerlatib ikki pas berildi — va Saloh darvoza qarshisida qulay pozitsiyada paydo bo‘ldi va kichik rikoshet orqali darvozani ishg‘ol etdi. Soboslai orqacha turgan holda assist berdi, bu vaqtda esa Konate va van Deyk Saloh bo‘sh hududga ega bo‘lishi uchun raqib himoyachilarini o‘zi bilan darvoza tomon olib ketishdi. Bu misrlik hujumchining «Siti» darvozasiga urgan 14-goli bo‘ldi va u Stiven Jyerrardning bu boradagi rekordini takrorladi.

«Siti» o‘yinning ko‘proq vaqtida to‘pga egalik qildi va ko‘proq zarba yo‘lladi (o‘yin oxirigacha 16:8, darvoza sohasiga to‘g‘ri borgan zarbalar bo‘yicha 5:4), ammo vaziyatlar yaqqol golli bo‘lmadi. Marmush darvozani ishg‘ol etdi, ammo uning goli ofsayd tufayli bekor qilindi. «Liverpul» chuqur himoyaga yotdi va raqibni qarshi hujumlarda jazolashga harakat qildi. Mehmonlar uchun faqat Doku va Trentning qarama-qarshiligi bo‘ldi, belgiyalik vinger o‘yin davomida 19 bor dribling ishlatdi va shundan 13 tasida muvaffaqiyatli harakat qildi, bu mavsumda bir o‘yin uchun eng yuqori ko‘rsatkich. Ammo uning va jamoadoshlarining qanotlardan jarima maydoniga uzatmalari naf keltirmadi.

37-daqiqada esa «Siti»ning pressingi ish bermadi va «Liverpul» yana oldinda bo‘sh zonalarga ega bo‘ldi. Odatdagidek Trent Salohga uzun pas berdi va mersisaydliklar hujumda to‘rtga to‘rt holatiga ega bo‘lishdi. Gvardiol ham, Ake ham Moga qarshilik ko‘rsata olishmadi va u jarima maydoni markazida ochilgan Soboslaini to‘p bilan ta’minladi, vengriyalik yarimhimoyachida to‘pni o‘ziga moslash va zarba berish uchun yetarlicha vaqt bo‘ldi. Ederson sakrab ham o‘tirmadi — 0:2.

Ikkinchi bo‘limga «Siti» katta shasht bilan tushdi va hatto qaysidir pallalarda mehmonlar jarima maydoni qurshab olindi. Tanaffusdan ko‘p o‘tmay, ikkala darvozabon ham bittadan seyv amalga oshirishga majbur bo‘ldi. Avvaliga Alison Doku yana bir bor Trentni aldab o‘tganidan keyin Marmushning zarbasini o‘ziga qabul qildi. Keyin Dias yo‘llagan zarbadan keyin Ederson o‘zini ko‘rsatdi.

56-daqiqada «Liverpul» o‘yin masalasini hal qilgandek ko‘ringandi — Jons uchinchi golni urdi. Ammo uni Soboslaidagi ofsayd holati tufayli bekor qilishdi. Bu vaziyatda Husanov o‘z vaqtida ofsayd chizig‘ini ushlashga ulgurgandi. Umuman olganda, o‘zbekistonlik himoyachi shu kuni jamoasidagi eng yorqin futbolchilardan biri bo‘ldi va bir necha vaziyatda jamoasini navbatdagi gollardan qutqardi. Squawka ma’lumotiga ko‘ra, Abduqodir Husanov to‘pni jamoasiga qaytarish bo‘yicha APL 26-turidagi eng yaxshi natijani qayd etdi: u shu kuni 12 marta bu ishni uddaladi.

O‘zbekistonlik himoyachi qatorasiga ikkinchi o‘yinda (oldingisi YeChLda «Real»ga qarshi) «Siti» himoyachilari orasida eng yuqori ballni oldi:

Ikkinchi bo‘limning ikkinchi yarmi to‘lig‘icha «Siti»ning ustunligida kechdi va mezbonlar deyarli har daqiqada «Liverpul» jarima maydonida keskinlik yuzaga keltirishdi. Slot Jons o‘rniga Endoni tushirib, himoyani kuchaytirdi. Yaponiyalik tayanch yarimhimoyachisisi muntazam ravishda himoya chizig‘ining beshinchi vakili bo‘lib o‘ynadi.

Lekin «Siti» to‘pga egalik qilish bo‘yicha katta ustunlikka erishganiga qaramay (66 ga 34), himoya devoridan o‘ta olmadi. «Liverpul» hisobni ushlab qolish uchun o‘ynadi va maydonning uchinchi qismida chuqur himoyalandi, ayrim vaziyatlarda Saloh ham himoyaga yordam berdi. Slot jamoasi taktik jihatdan moslashuvchanroq bo‘lib chiqdi — «Siti» bilan taqqoslaganda ham, Klopp davridagi «Liverpul» bilan taqqoslaganda ham. Ikki gol ustunligi katta kuch sarflanmay saqlab qolindi.

Endi APL peshqadami eng yaqin ta’qibchisi «Arsenal»dan 11 ochkoga o‘zib ketgan. Amalda faqat chempionlikni rasmiylashtirishgina qolgan. «Siti» esa Chempionlar ligasi yo‘llanmasini qo‘lga kiritish uchun ham ko‘p ter to‘kishiga to‘g‘ri keladi.

«Nyukasl» — «Nottinghem Forest» 4:3
Gollar: Mayli (23), Merfi (25), Isak (33 penalti, 34) — Hadson-Odoi (6), Milenkovich (63), Yyeyts (90).
«Nyukasl» — Poup, Holl, Bern, Sher, Livramento, Uillok (Tonali, 70), Bruno Gimaraes, Mayli, Gordon, Merfi (Barns, 70), Isak (Uilson, 87). 
«Nottinghem Forest» — Zels, Uilyams, Murillo, Milenkovich, Ayna, Anderson (Sangare, 77), Dominges (Yyeyts, 76), Gibbs-Uayt, Hadson-Odoi, Elanga, Vud. 
Ogohlantirishlar: Milenkovich (45+2), Anderson (52), Livramento (55), Dominges (74), Yyeyts (90+2).

Chempionlar ligasi yo‘llanmasi uchun da’vogar ikki jamoa o‘yini «Nottinghem» uchun sevimli ssenariyda boshlandi — birinchi bo‘limda gol ur va hisobga o‘yna. Ammo bu safar Nunu Eshpiritu Santuning retseptlari ish bermadi. «Nyukasl» qaysidir pallada o‘ziga keldi, keyin esa «o‘rmonchilar» mudofaasining o‘ng qanotini parchalab tashladi. Ammo bundagi asosiy harakatlanuvchi kuch odatdagi kabi Gordon emas, balki himoyachi Holl bo‘ldi, u o‘n daqiqalik benefis uyushtirdi.

Bu vaqt boshlanishida ushbu lateral hisobni tenglashtirgan Mayliga assistentlik qildi. Biroz o‘tib uning pasidan keyin rikoshet bo‘lib yo‘nalishini o‘zgartirgan to‘p bo‘sh darvoza qarshisida qolgan Myorfiga yetib bordi. Nihoyat Hollning uzatmasidan keyin to‘p mehmonlar himoyachisining qo‘liga tegdi va monitor qarshisiga borib vaziyatni ko‘rgan bosh hakam penalti belgiladi.

Isak 11 metrlik jarima zarbasini aniq ijro etib, APL tarixidagi eng yaxshi shvetsiyalik to‘purarga aylandi. U Fredi Yungbergning natijasini yaxshiladi, keyin esa yangi plankani o‘rnatdi — 50 gol. Unga bu natijaga erishish uchun APLda 76 o‘yin yetarli bo‘ldi. Uning gollari «Nyukasl»ning g‘alabasini ta’minladi, chunki «Nottinghem» oxirigacha kurashdi va final hushtagi chalinguniga qadar hisobni minimumgacha qisqartirdi. Jamoalarning turnir jadvallaridagi o‘rinlari (uchinchi va beshinchi) o‘zgarmay qoldi, lekin «Nyukasl» oradagi farqni uch ochkogacha qisqartirdi.

Ispaniya: Modrich 39 yoshida ham gol urmoqda

«Atletik» — «Valyadolid» 7:1
Gollar: Xauregisar (10), N.Uilyams (35, 66), Sannadi (43), Sanset (45+2),  Guruseta (69), I.Uilyams (87).
«Atletik» — Unai Simon, Berchiche, Paredes, Vivian, De Markos (Lekue, 75), Vesga, Xauregisar (Ruis de Galarreta, 64), Niko Uilyams (Kanales, 68), Sanset (Berenger, 68), Inyaki Uilyams, Sannadi (Guruseta, 64).
«Valyadolid» — Heyn, Kandela (Machis, 46), Peres, Torres, Aydu (Jyemert, 65), Sanches, Chuki (Moro, 46), Yurich, Martin (Grillich, 61), Silla, Markos Andre (Nikicher, 68).
Ogohlantirishlar: Martin (44), Yurich (46), 
Chetlatish: Yurich (56), Vivian (79), de Galarreta (84).

Aytish mumkinki, Ispaniyada hozirda chempionlik uchun kurashayotgan «katta uchlik», «Atletik» va boshqa jamoalar bor. Ernesto Valverde Bilbaodagi faoliyati bilan yaxshi taassurot qoldirmoqda. Basklar tomoshabop o‘yin ko‘rsatmoqda, «Valyadolid»ga qarshi o‘yin esa Niko Uilyamsning benefisiga aylandi. Yakshanba kuni mezbonlar yettitadan ham ko‘proq gol urishi mumkin edi, ammo hakam mehmonlarga rahm qilib, o‘yinni 90-daqiqadan oldinroq ham tugatib yubordi. O‘ynalgan vaqt davomida esa mezbonlar 16 bor darvoza sohasiga to‘g‘ri borgan zarba yo‘llashdi. Ispaniya chempionatida bunday ko‘rsatkich 2023 yil aprelidan beri qayd etilmagandi, o‘shanda xuddi shu «Valyadolid» «Real» tomonidan o‘qqa tutilgandi (17 ta zarba).

«Real» — «Jirona» 2:0
Gollar: Modrich (41), Vinisius (83).
«Real» — Kurtua, Vaskes, Alaba (Kamavinga, 73), Asensio, Mendi, Chuameni, Modrich (Ryudiger, 85), Dias (Seballos, 73), Vinisius (Endrik, 90), Rodrigo, Mbappe.
«Jirona» — Gassaniga, Lopes, Kreychiy, Blind, Martines, Romeu (Romero, 66), Martin (Xil, 66), Gutiyerres (Miovski, 75), Van de Bek (Artur, 56), Tsigankov, Danjuma (Asprilya, 66). 
Ogohlantirishlar: Kreychiy (64), Romero (70).

«Real»ning navbatdagi o‘yini arafasida madridliklar 39 yoshli Modrich bilan shartnomani 2026 yil yoziga qadar uzaytirmoqchi ekani haqida xabar tarqaldi. Yoshi tufayli ko‘pchilik tomonidan allaqaachon pensiyaga yuborilgan Luka esa hali yana bir bor jahon chempionatida o‘ynamoqchi. Hozircha bu insayd qanchalik to‘g‘ri ekani noma’lum, ammo xorvatiyalik futbolchi to‘xtamoqchi emasligi ko‘rinib turibdi.

Qolaversa, uning «Jirona» darvozasiga uzoq masofadan aylantirib yo‘llangan aniq zarbasi — 2025 yil boshidan buyon to‘rtinchisi bo‘ldi. Bu raqamni yanada aniqroq baholash uchun bu oldingi ikki yilda urilgan shunday gollar sonidan ikki baravar ko‘pligini keltirish mumkin. Modrich sermahsullik bo‘yicha Vinisius Junior bilan bir xil ko‘rsatkich qayd etmoqda, braziliyalik vinger la ligada 2024 yil 9 noyabrdan buyon gol urmayotgandi (uning jamoa safidagi oxirgi goliga ham bir oy bo‘ldi — YeChLning asosiy bosqichida «Zalsburg»ga qarshi o‘yinda). U golsiz seriyasiga 83-daqiqada Mbappe bilan kombinatsiyadan keyin barham berdi va o‘yin taqdirini hal qildi.

25-turda kuchli uchlikdagi barcha jamoalar uchtadan ochko jamg‘ardi, bunaqasi esa doim ham kuzatilmaydi. Keyingi turda buni takrorlash oson bo‘lmaydi: «Real»ni «Betis»ga qarshi o‘yin kutmoqda, «Barselona» —  «Sosedad», «Atletiko» — «Atletik» bilan o‘ynaydi.

Italiya: «Napoli» inqirozda, «Atalanta» — skudetto uchun poygaga qaytdi

«Komo» — «Napoli» 2:1
Gollar: Rrahmani (7, avtogol), Diao (77) — Raspadori (17).
«Komo» — Byute, Valle, Kempf, Goldaniga, Smolchich, Pas (Duvikas, 90), Strefetssa (Voyvoda, 90), Da Kunya (Engelhardt, 81), Perrone, Kakre (Kutrone, 72), Diao (Fadera, 81).
«Napoli» — Meret, Buonjorno, Rrahmani, Di Lorenso, Spinatssola, Maktominey, Lobotka (Okafor, 84), Billing (Zambo-Angissa, 62), Politano (Ngonj, 77), Raspadori, Lukaku (Simeone, 62).
Ogohlantirishlar: Pas (24), Di Lorenso (68), Maktominey (83), Simeone (87).

Bir kun oldin «Milan» darvozaboni Menyan to‘pni o‘z jamoadoshi Tshauga qarata tepib, kulgili avtogolga hammualliflik qilgandi. Bir kun o‘tib «Napoli» himoyachisi Rrahmani unga raqobat ko‘rsatishni xohlab, orqaga qaramasdan darvoza tomon kuchli pas berdi, Meret esa bunga tayyor emasdi. Ko‘p o‘tmay Lukakuning o‘yini chiqmagan kunlari o‘z gollari bilan jamoasi joniga ora kiradigan Raspadori hisobni tenglashtirdi, ammo shu kuni neapolitanliklar uyga bir ochko ham olib keta olmadi.

Qishda jamoani kuchaytira olgan Sesk Fabregas «Komo»ni yangi darajaga olib chiqmoqda. V seriyadan chiqqan debyutant o‘tgan turda «Fiorentina» maydonida g‘alaba qozongandi, bu safar esa skudettoga da’vogarlardan birini mag‘lub etdi. Italiyaga oson moslashayotgan «Betis» tarbiyalanuvchisi Assane Diallo bu o‘yinda ham o‘z nomini tabloga yozdirib qo‘ydi. Niko Pasning uzatmasidan keyin himoyachilardan qochib ketgan 19 yoshli forvard A seriyadagi sakkizinchi o‘yinida beshinchi golini urdi. Bu shu yoshdagi futbolchilar uchun top-5 ligalardagi eng yuqori sermahsullik. 

Ushbu yosh futbolchi Kutroneni zaxirada qoldirmoqda va «Komo»ni xavfli zonadan olib chiqmoqda. «Napoli» esa qatorasiga to‘rtinchi o‘yinda ochko yo‘qotdi va uch durangdan keyin mag‘lubiyatga uchradi. Antonio Konte jamoasi peshqadamlikni qaytarib olish uchun hafta oxirida «Inter»ni mag‘lub etishi kerak. Bu uchrashuv chempionlik o‘yiniga aylanadi.

«Empoli» — «Atalanta» 0:5
Gollar: Gyasi (27, avtogol), Retegi (33), Lukman (43, 55), Dzappakosta (74).
«Empoli» — Silvestri, Kakache, De Shilo, Goglichidze, Grassi (Jurkovski, 72), Male (Kovalenko, 83), Henderson, Petssella, Gyasi (Sambiya, 57), Espozito (Kampanello, 72), Kuame (Kolombo, 58).
«Atalanta» — Karnezekki, Kolashinats, Jimsiti (Toloi, 63), Posh, Lukman (Kuadrado, 76), de Ketelare (Ederson, 63), Dzappakosta (Rujyeri, 86), Pashalich (Breshianini, 76), de Ron, Bellanova, Retegi. 
Ogohlantirish: Karnezekki (67). 

YeChL umumiy guruhida kuchli o‘yin ko‘rsatganiga qaramay, yakunda sakkizlikka kira olmagan va o‘tish o‘yinlarida kamtarona «Bryugge» to‘sig‘idan o‘tolmagan «Atalanta» bor alamini «Empoli»dan oldi. Bergamoliklar «Bryugge» darvozasiga kirmagan gollarini ham yakshanba kuni urib olishdi. Birinchi bo‘lim o‘rtalaridan o‘tganda Dzappakostaning jarima maydoniga uzatmasidan keyin to‘p Gyassining boshiga tekkan holda darvoza to‘riga yo‘l oldi va mehmonlarning ishtahasi ochildi. Yevrokubokda muhim penaltini ura olmagan va murabbiydan dakki eshitib olgan Lukman ikkita gol urdi. Nigeriyalik futbolchi ayni vaqtda jamoasining Italiya chempionatining qatorasiga uchinchi mavsumida kamida o‘nta gol urayotgan yagona futbolchisi. Asosiysi esa — Jan Piyero Gasperini shogirdlari skudetto uchun kurashga qaytdi. Birinchi o‘rin bilan atigi uch ochko ajratib turibdi.

«Kalyari» — «Yuventus» 0:1
Gol: Vlahovich (12). 
«Kalyari» — Kaprile, Zappa, Mina, Luperto, Aujyello, Zortea (Marin, 70), Adopo (Viola, 70), Makumbu (Pavoletti, 86), Deyola (Koman, 58), Felichi (Luvumbu, 46), Pikkoli. 
«Yuventus» — Di Gregorio, Vea, Gatti, Kelli, Kambiyazo (Ruhi, 73), Kopmeyners (Kolo-Muani, 62), Lokatelli (Tyuram, 73), Konseysau (Luiz 62, Mbangula 82), Makkenni, Yildiz, Vlahovich 
Ogohlantirish: Vea (49).

YeChLning yana bir omadsiz ishtirokchisi bor e’tiborini ichki chempionatga qaratish imkoniyatiga ega bo‘ldi. «Yuventus» «Latsio»ning mag‘lubiyatidan foydalandi va Sardiniyada g‘alaba qozonib, to‘rtinchi o‘ringa ko‘tarildi. Yakshanba kungi o‘yinlarni yakunlab bergan turinliklar ilk daqiqalardan kuchli bosim uyushtirishdi va Tiagu Motta hujumchi tanlashda to‘g‘ri tanlov qilgani oydinlashdi. Oxirgi turlarda Kolo Muani bilan raqobatda yutqazayotgan Vlahovich maydonga katta ishtiyoq bilan tushib keldi. Himoyachining xatosini poylagan serbiyalik hujumchi to‘pni egallab olgach, darvozabonni ham aldab o‘tdi va o‘tkir burchakdan bo‘sh qolgan darvozani ishg‘ol etdi. Bu Vlahovichning «Yuventus»dagi (42+8) 50-golli natijasi bo‘ldi va u asosiy tarkibga qaytish uchun jiddiy qadam tashladi.

Germaniya: «Bavariya» uchun yengil sayr

«Bavariya» — «Ayntraxt» 4:0
Gollar: Olise (45+3), Ito (62), Musiala (83), Gnabri (90+3).
«Bavariya» — Noyyer, Ito (Devis, 63), Kim Min Je, Dayyer, Laymer, Pavlovich, Kimmih (Goretska, 43), Sane, Musiala (Gnabri, 85), Olise (Koman, 85), Myuller (Keyn, 64). 
«Ayntraxt» — Trapp, Teate, Tuta, Kristensen, Uzun (Vai, 46), Baoyya (Gyotse, 63), Hoylund (Sxiri, 46), Larsson, Kollinz, Knauff (Braun, 75), Ekitik (Batshuayi, 75).
Ogohlantirishlar: Sane (77), Tuta (80).

Bundesligada turning markaziy o‘yini kutilganidek o‘tdi, deb bo‘lmaydi. Sababi — «Bavariya» fonida chempionatning uchinchi jamoasi uchun juda kamtar ko‘ringan «Ayntraxt»da. Bu birinchi davradagi oltita gol (3:3) urilgan va Marmushning benefisiga (2+1) aylangan dramatik o‘yindan butkul farqlicha o‘yin bo‘ldi. Ekitik, albatta, yaxshi futbolchi, ammo myunxenliklarga muammo tug‘diradigan darajada emas. Holbuki Vensan Kompani bu o‘yin uchun qilgan katta rotatsiya uyushtirib, Deyvis, Goretska va Keynni zaxira o‘rindig‘ida qoldirgandi.

«Burgutlar» mavsum startidan buyon ilk bor o‘yinni golsiz tark etishdi. Jamoa birinchi bo‘lim oxirigacha bazo‘r chidab turdi, ammo bo‘limga qo‘shib berilgan daqiqalarda Sane bo‘sh qolgan darvoza qarshisidagi Oliseni to‘p bilan ta’minladi. Tanaffusdan keyin esa Germaniyaning eng ishonchli va barqaror darvozabonlaridan biri hisoblangan Trapp «Ayntraxt»ni uyaltirib qo‘ydi. Uning to‘pga chiqishdagi xatosi va alamli rikoshet Itoning bo‘sh qolgan darvozani ishg‘ol etishi bilan yakunlandi. O‘yin oxirlarida Musiala uchinchi golni urgunicha ham mezbonlarda ko‘plab yaqqol vaziyatlar bo‘ldi. Germaniyadagi chempionlik masalasi amalda hal bo‘lgan, yilning asosiy intrigasi esa YeChLda «Bavariya» va «Bayyer» o‘rtasidagi qarama-qarshilik bo‘ladi.