Xitoy avtomobil va elektronika uchun zarur og‘ir nodir metallar eksportini chekladi

Xitoy Savdo vazirligi 4 apreldan boshlab bir qator og‘ir nodir metallar va kamyob magnitlar eksportida cheklov joriy etdi, deb yozmoqda The New York Times.

Endilikda eskportchilar ushbu metallar va magnitlarni yuborishda maxsus litsenziya olishlari talab etiladi. Shu bilan birga, litsenziya taqdim etuvchi tizimni yaratish ustida ishlar endi boshlangan bo‘lib, bu jarayonning cho‘zilishiga olib kelishi mumkin.

Hukumat yangi tartibga solish tizimini ishlab chiqqunga qadar Xitoyning ko‘plab portlarida magnitlar eskporti to‘xtatib qo‘yilgan.

Holland & Knight yuridik firmasining qayd etishicha, eksportdagi cheklovlar global ta’minot zanjirlariga «ham darhol, ham strategik ta’sir» ko‘rsatishi mumkin. Og‘ir nodir metallardan avtomobil sanoati, dronlar, robotlar, raketa va fazoviy apparatlar uchun juda muhim bo‘lgan magnitlarda foydalaniladi. Bu metallar, shuningdek, reaktiv dvigatellar, lazerlar, avtomobil chiroqlari va ayrim o‘t oldirish «svecha»sini ishlab chiqarishda kerak bo‘ladigan kimyoviy moddalar tarkibiga kiradi.

CRU tadqiqot markazi ma’lumotlariga ko‘ra, Xitoy dunyodagi nodir magnitlarining taxminan 90 foizini yetkazib beradi. NYT’ning yozishicha, bu magnitlar Xitoyning AQShga qiladigan umumiy eksportining juda kichik qismini tashkil qiladi va mamlakat uchun minimal iqtisodiy yo‘qotishlarga sabab bo‘lsa-da, boshqa davlatlar uchun salbiy oqibatlari sezilarli bo‘lishi mumkin.

Barcha davlatlarga qarshi «savdo urushi» doirasida AQSh prezidenti Donald Tramp Xitoy tovarlari importiga ham bojlar joriy etdi — ularning umumiy qiymati 145 foizga yetdi. Tramp tomonidan bojlarning oshirilishiga javoban Pekin ham Amerika tovarlariga bojlarni 125 foizgacha ko‘tardi.