Aliyev Rossiyani Ozarboyjonning Ukrainadagi energetika obektlariga zarba berishda aybladi

Boku va Kiyev Rossiya Ozarboyjonning Ukrainada joylashgan SOCAR kompaniyasiga qarashli neft bazasiga zarba berganini ta’kidlamoqda.

Foto: president.az

Ozarboyjon va Ukraina prezidentlari Ilhom Aliyev va Volodimir Zelenskiy telefon orqali muloqot chog‘ida Ozarboyjonning Ukrainada joylashgan SOCAR kompaniyasiga qarashli energetika obektlariga Rossiya tomonidan qilingan hujumni qoraladilar. Bu haqda Ozarboyjon prezidentining saytida ma’lum qilindi.

Ta’kidlanishicha, tomonlar Ozarboyjonning Ukraina hududida joylashgan SOCAR kompaniyasiga qarashli neft ombori hamda Ukrainaga Ozarboyjondan gaz yetkazib beruvchi kompressor stansiyasiga Rossiya tomonidan aviazarbalar berilganini qoralashgan.

Caliber.az nashrining yozishicha, 8 avgustga o‘tar kechasi Odessadagi SOCAR neft bazasiga hujum uyushtirilgan. Rossiya mudofaa vazirligi 2 avgustdan 8 avgustga qadar Ukrainadagi “harbiy-sanoat majmuasiga qarashli korxonalar faoliyatini ta’minlovchi gaz transport tizimi obektlari” yo‘q qilinganini ma’lum qildi.

Ukrainada Ozarboyjonning SOCAR davlat neft-gaz kompaniyasi vakolatxonasi mavjud. SOCAR Ukraine avtomobillarga yonilg‘i quyish tarmog‘i hamda Odessa, Kiyev, Xarkiv, Lviv va Vinnitsada neft bazalariga ega.

#Ukraina #Ilhom Aliyev #Rossiya #Ozarboyjon #Volodimir Zelenskiy